ប្រមុខសម្ព័ន្ធយោធាណាតូថ្មី លោក Mark Rutte ដែលបានចូលកាន់តំណែងមិនដល់មួយសប្តាហ៍ផង លោកបានឆ្លៀតឱកាសទៅធ្វើទស្សនកិច្ចនៅប្រទេសអ៊ុយក្រែន ដើម្បីបង្ហាញការគាំទ្ររបស់លោក។

លោក Rutte បានជួបពិភាក្សាជាមួយប្រធានាធិបតី លោក Volodymyr Zelenskyy កាលពីថ្ងៃព្រហស្បតិ៍ ដោយលោកបានសន្យាថា នឹងជួយជ្រោមជ្រែងជំនួយរបស់ប្រទេសលោកខាងលិច។

លោក Rutte និយាយថា «ខ្ញុំមកអ៊ុយក្រែន នៅពេលចាប់ផ្តើមអាណត្តិរបស់ខ្ញុំ ដើម្បីបញ្ជាក់ឱ្យច្បាស់ចំពោះអ្នក ប្រជាជនអ៊ុយក្រែន និងអ្នកគ្រប់គ្នាដែលកំពុងឃ្លាំមើលថា សម្ព័ន្ធយោធាNATO ឈរនៅជាមួយអ៊ុយក្រែន»។ លោក Zelenskiy បានស្នើដដែលៗនូវសំណើរបស់លោក សម្រាប់សម្ព័ន្ធណាតូ ដើម្បីផ្តល់ឲ្យកងកម្លាំងរបស់លោក នូវអាវុធរយៈចម្ងាយឆ្ងាយ។

លោក Zelenskiy និយាយថា អ្វីដែលយើងត្រូវការនៅក្នុងតំបន់របស់យើង គឺការប្តេជ្ញាចិត្តបន្ថែមទៀតពីសំណាក់ដៃគូរបស់យើងដើម្បីនាំទៅរកការបញ្ចប់ភេរវកររុស្ស៊ី។ យើងនឹងបន្តសុំដល់ដៃគូរបស់យើងនូវតម្រូវការក្នុងការបាញ់ទម្លាក់មីស៊ីល និងយានដ្រូនរបស់រុស្ស៊ី។

លោក Zelenskiy បានពន្យល់ពីគំនិតរបស់លោកសម្រាប់ការបញ្ចប់សង្រ្គាម ជាផ្នែកមួយនៃអ្វីដែលលោកហៅថា «ផែនការជ័យជម្នះ»។ លោកសង្ឃឹមថា នឹងប្រមូលបានការគាំទ្រ នៅពេលដែលលោកជួបជាមួយមេដឹកនាំមកពីជាង ៥០ ប្រទេស នៅសប្តាហ៍ក្រោយ ក្នុងប្រទេសអាល្លឺម៉ង់។

ការព្រមានអំពីការវាយឆ្មក់តាមអាកាស ត្រូវបានចេញពីរលើក ក្នុងរដ្ឋធានីរបស់អ៊ុយក្រែន កាលពីថ្ងៃព្រហស្បតិ៍ ទី៣ ខែតុលា ខណៈប្រមុខសម្ព័ន្ធយោធាណាតូ លោក Mark Rutte បានទៅដល់ទីក្រុង គីវ ក្នុងដំណើរទស្សនកិច្ចផ្លូវការលើកដំបូងរបស់លោក ចាប់តាំងពីបានក្លាយជាអគ្គលេខាធិការថ្មីរបស់សម្ព័ន្ធយោធាណាតូ។