ប្រធានាធិបតីប្រទេសម៉ិកស៊ិក លោកស្រី ក្លៅឌៀ សេនបោម(Claudia Sheinbaum បាននិយាយកាលពីថ្ងៃព្រហស្បតិ៍ ទី៣ ខែតុលា ថា ការសម្លាប់ជនអន្តោប្រវេសន៍ចំនួន៦នាក់ ដែលបានកើតឡើងនៅរដ្ឋ Chiapas ប្រព្រឹត្តដោយទាហានម៉ិកស៊ិក ដែលបានបាញ់ទៅលើក្រុមជនអន្តោប្រវេសន៍ចំនួន ៣៣នាក់ កំពុងធ្វើដំណើរតាមរថយន្តភីកអាប់មួយគ្រឿង ថាគឺជា «ហេតុការណ៍គួឲ្យសោកស្ដាយ» និងបាននិយាយថា ការស៊ើបអង្កេតកំពុងធ្វើឡើង។

ក្រសួងការពារជាតិ បាននិយាយថា ជនអន្តោប្រវេសន៍៦នាក់បានស្លាប់ បន្ទាប់ពីទាហានម៉ិកស៊ិក បានបាញ់ទៅលើក្រុមជនអន្តោប្រវេសន៍មានគ្នា៣៣នាក់ ដែលបានព្យាយាមគេចចេញពីការល្បាតរបស់យោធា ដោយបានបញ្ជាក់ពីភាពតានតឹងនៅតាមព្រំដែនភាគខាងត្បូងប្រទេសម៉ិកស៊ិក ខណៈខ្លួនប្រឈមមុខទៅនឹងសម្ពាធរបស់សហរដ្ឋអាមេរិក ដើម្បីទប់ស្កាត់ការធ្វើអន្តោប្រវេសន៍។

លោកស្រី Sheinbaum បាននិយាយនៅក្នុងសន្និសីទសារព័ត៌មានថា «វាត្រូវតែបានស៊ើបអង្កេត និងដាក់ទណ្ឌកម្ម»។ មេដឹកនាំរូបនេះ ក៏បាននិយាយផងដែរថា ទាហានដែលពាក់ព័ន្ធត្រូវបានប្រគល់ទៅឱ្យការិយាល័យរដ្ឋអាជ្ញា ហើយវិធានការនានា កំពុងត្រូវបានអនុវត្តដើម្បីបញ្ចៀសហេតុការណ៍ស្រដៀងគ្នានៅពេលក្រោយ។

ក្រសួងការពារជាតិ បាននិយាយនៅក្នុងសេចក្តីថ្លែងការណ៍ថា ជនអន្តោប្រវេសន៍១០នាក់ផ្សេងទៀតបានរងរបួសក្នុងឧបទ្ទវហេតុនេះកាលពីថ្ងៃអង្គារ ទី១ ខែតុលា។ ក្រុមជនអន្តោប្រវេសន៍ រួមមានជនជាតិអេហ្ស៊ីប នេប៉ាល់ គុយបា ឥណ្ឌា និងជនជាតិប៉ាគីស្ថាន។