លោកប្រធានាធិបតី វ្ល៉ូឌីមី ហ្សេឡិនស្គី (Vladimir Zelensky) បានទទួលស្គាល់បន្ទាប់ពីបានជួបជាមួយអគ្គលេខាធិការថ្មីរបស់អង្គការណាតូ លោក Mark Rutte នៅរដ្ឋធានីអ៊ុយក្រែនថា សម្ព័ន្ធមិត្តរបស់ទីក្រុងគីវ មិនទាន់ត្រៀមខ្លួនរួចរាល់ក្នុងការបាញ់ទម្លាក់មីស៊ីល និងយានដ្រូនរបស់រុស្ស៊ីពីលើទឹកដីអ៊ុយក្រែនទេ។

លោក ហ្សេឡិនស្គី បាននិយាយនៅក្នុងសន្និសីទសារព័ត៌មានមួយដែលត្រូវបានចាក់ផ្សាយនៅលើគេហទំព័ររបស់សម្ព័ន្ធភាពយធាថា៖«ចំពោះថាតើសម្ព័ន្ធមិត្ត [ណាតូ] ត្រៀមខ្លួនរួចជាស្រេចក្នុងការបាញ់ទម្លាក់ [មីស៊ីលរុស្ស៊ី និងយានដ្រូននៅលើទឹកដីអ៊ុយក្រែន] ឬយ៉ាងណានោះ យើងកំពុងធ្វើការជាមួយអ្នកគ្រប់ គ្នា។ ពួកគេមិនទាន់ត្រៀមខ្លួននៅឡើយទេ»។

លោក ហ្សេឡិនស្គី បានអះអាងថា បណ្តាប្រទេសលោកខាងលិច ត្រៀមខ្លួនជាស្រេចក្នុងការផ្តល់ជំនួយក្នុងការការពារដែនអាកាសរបស់អ៊ីស្រាអែល ប៉ុន្តែមិនមែនការពារអ៊ុយក្រែនទេ។

លោកបាននិយាយថា៖«ជាការពិត យើងចង់ឲ្យអ៊ុយក្រែនមិនត្រូវបំភ្លេចចោល (ចំពេលមានការកើនឡើងភាពតានតឹងនៅមជ្ឈិមបូព៌ា» ហើយជាថ្មីម្តងទៀត លោកអំពាវនាវឲ្យទីក្រុងគីវត្រូវបានផ្តល់នូវ«អាវុធសមស្រប» និងការសម្រេចចិត្ត ត្រូវបានធ្វើឡើងលើការវាយប្រហារចូលជ្រៅទៅក្នុងសហព័ន្ធរុស្ស៊ី។

មុននេះ ប្រទេសប៉ូឡូញ បានបង្កើតគំនិតនៃការការពារដែនអាកាសអ៊ុយក្រែន ដោយមានជំនួយពីប្រព័ន្ធការពារដែនអាកាសនៅលើទឹកដីនៃប្រទេសណាតូ ប៉ុន្តែថ្នាក់ដឹកនាំរបស់សម្ព័ន្ធភាពយោធានេះ បានសង្កត់ធ្ងន់ថា ការសម្រេចចិត្តបែបនេះ អាចត្រូវបានធ្វើឡើង បន្ទាប់ពីការពិគ្រោះយោបល់ជាមួយសម្ព័ន្ធមិត្តទាំងអស់។