ភ្នំពេញ៖ ថ្ងៃទី៣០ ខែកញ្ញា ឆ្នាំ២០២១ លោកទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានអញ្ជើញជាអធិបតីក្នុងពិធីបើកសិក្ខាសាលាថ្នាក់ជាតិ ស្តីពីកិច្ចសង្គ្រោះជនរងគ្រោះថ្នាក់ដោយសារមីន និងសំណល់ជាតិផ្ទុះសល់ពីសង្គ្រាម ដែលបានរៀបចំឡើងតាមរយៈប្រព័ន្ធវីដេអូ ព្រមទាំងមានការអញ្ជើញចូមរួមពីក្រសួង/ស្ថាប័នពាក់ព័ន្ធ ម្ចាស់ជំនួយ(KOICA, DFAT, New Zealand) ដៃគូអភិវឌ្ឍន៍ជាតិ-អន្តរជាតិ (កាកបាទក្រហមកម្ពុជា មូលនិធិជនពិការ មជ្ឈមណ្ឌលស្តារលទ្ធភាពពលកម្មកាយសម្បទា អង្គការ UNDP, UNICEF, ICRC, H&I, Exceed World Wide, ACCESS, VIC, SBCF, ISU និង GICHD ប្រតិបត្តិរករបោសសម្អាតមីនជាតិ-អន្តរជាតិ និងភាគីពាក់ព័ន្ធដទៃទៀត។

សិក្ខាសាលានេះ ប្រព្រឹត្តិទៅក្នុងគោលបំណង ដើម្បីធ្វើការតាមដានសកម្មភាពលើកិច្ចការងារជួយដល់ជនរងគ្រោះថ្នាក់ដោយសារមីន និងសំណល់ជាតិផ្ទុះពីសង្រ្គាម ក៏ដូចជាការផ្តល់សេវាកម្មនានា ដល់ជនរងគ្រោះថ្នាក់ដោយសារមីន និងសំណល់ជាតិផ្ទុះពីសង្រ្គាម ក្រុមគ្រួសាររបស់ពួកគេ និងជនមានពិការភាពទូទៅពីគ្រប់ភាគីពាក់ព័ន្ធ និងដើម្បីជួយជម្រុញលើកទឹកចិត្តដល់ប្រតិបត្តិករបោសសម្អាតមីនជាតិ និងអន្តរជាតិ ឱ្យគិតគូររៀបចំកម្មវិធីជួយដល់កិច្ចសង្គ្រោះជនរងគ្រោះថ្នាក់ដោយសារមីន និងសំណល់ជាតិផ្ទុះពីសង្រ្គាម និងធ្វើឱ្យប្រសើរឡើងនូវស្ថានភាពនៃការរស់នៅ និងបញ្ចូលពួកគេទៅក្នុងសង្គម។លោកទេសរដ្ឋមន្រ្តី បានលើកឡើងថា សម្តេចតេជោនាយករដ្ឋមន្រ្តី និងសម្តេចកិត្តិព្រឹទ្ធបណ្ឌិត តែងតែផ្តល់នូវទឹកចិត្តអាណិតអាសូរសណ្តោសប្រណី និងយកចិត្តទុកដល់ជីវភាពរស់នៅរបស់បងប្អូនប្រជាពលរដ្ឋមានពិការភាព ដោយពុំឲ្យមានការរើសអើងឡើយ ជាពិសេសជួយដល់ការងារមនុស្សធម៌ដល់ជនមានពិការភាពគ្រប់បែបយ៉ាងតាមរយៈការផ្តល់ជាប្រាក់ឧបត្ថម្ភ ផ្តល់ប័ណ្ណក្រីក្រ ផ្តល់សេវាសុខាភិបាលដោយឥតគិតថ្លៃ ផ្តល់ការបណ្តុះបណ្តាលវិជ្ជាជីវៈ ផ្តល់ដីសង្គមកិច្ច និងការសាងសង់លំនៅដ្ឋានសមរម្យសម្រាប់ពួកគាត់និងក្រុមគ្រួសារ។

លោកបន្តទៀតថា រាជរដ្ឋាភិបាលកម្ពុជា ក្រោមការដឹកនាំប្រកបដោយកិត្តិបណ្ឌិតរបស់សម្តេចតេជោនាយករដ្ឋមន្រ្តី បានបង្កើតនូវច្បាប់លើកកម្ពស់សិទ្ធិជនពិការ ព្រមទាំងបានដាក់ចេញនូវគោលនយោបាយ និងជម្រុញឲ្យគ្រប់ក្រសួង/ស្ថាប័ន ក៏ជាវិស័យឯកជនទាំងអស់ត្រូវលើកទឹកចិត្ត និងជ្រើសរើសយកបងប្អូនមានពិការភាពឲ្យអាចមានលទ្ធភាពចូលបម្រើការងារ ផងដែរ។

ជាមួយគ្នានេះ ក្នុងនាមរាជរដ្ឋាភិបាលកម្ពុជា លោកទេសរដ្ឋមន្រ្តី បានថ្លែងអំណរគុណយ៉ាងជ្រៅជូនចំពោះប្រទេសជាមិត្ត ដែលបានផ្តល់នូវទឹកចិត្តមេត្តាធ៌ម ករុណា ចូលរួមជួយដល់ប្រជាពលរដ្ឋមានពិការភាព ក៏ដូចជាអង្គការសង្គមស៊ីវិលដែលបានជួយដល់ការផលិតអាវយវសិប្បនិមិត្ត និងការគាំពារសុខមាលភាព និងជីវភាពរស់នៅរបស់ពួកគាត់។

លោកទេសរដ្ឋមន្រ្តី តែងតែជំរុញ និងលើកទឹកចិត្តដល់បងប្អូនមានពិការភាព មិនមែនមានន័យថា អសមត្ថភាពទេ ហើយបានបញ្ជាក់បន្ថែមអំពីការងារចំពោះមុខរបស់យើង គឺការទប់ស្កាត់កុំឲ្យមានពិការភាពបន្តទៀត និងលើកកម្ពស់ជីវភាពរស់នៅជនមានពិការភាព និងក្រុមគ្រួសាររបស់ពួកគាត់ឲ្យកាន់តែប្រសើរឡើង ដោយត្រូវ ទី១.ជំរុញ​ការងារបោសសម្អាតមីន និងសំណល់ជាតិផ្ទុះពីសង្រ្គាមឲ្យអស់ពីប្រទេសកម្ពុជា ទី២.បន្តផ្សព្វផ្សាយអប់រំយល់ដឹងអំពីមីន/សំណល់ជាតិផ្ទុះពីសង្រ្គាម និងទី៣.ត្រូវបន្តបណ្តុះបណ្តាលវិជ្ជាជីវៈ ជំនាញ និងចំណេះដឹងដល់បងប្អូនមានពិការភាព និងក្រុមគ្រួសារ ដើម្បីឲ្យពួកគាត់មានលទ្ធភាពគ្រប់គ្រាន់។

ចាប់ពីខែមករា ដល់ខែកញ្ញា ឆ្នាំ២០២១ មានជនរងគ្រោះដោយសារមីន និងសំណល់ជាតិផ្ទុះពីសង្រ្គាម ចំនួន ៣៤នាក់ (ស្លាប់ ១០នាក់ របួស ១៨នាក់ និងពិការអវៈយវៈ ៦នាក់) តួលេខនេះបង្ហាញពីការថយចុះ ៣៨% បើប្រៀបធៀបជាមួយនឹងរយៈពេលដូចគ្នាក្នុងឆ្នាំ២០២០ ដែលមានជនរងគ្រោះដោយសារយុទ្ធភណ្ឌគ្រឿងផ្ទុះចំនួន ៥៥នាក់។

ទេសរដ្ឋមន្រ្តី អនុប្រធានទី១ អាជ្ញាធរមីន បានបន្តលើកឡើងថា សិក្ខាសាលានេះ គឺជាវេទិកាសម្រាប់ជួបជុំរវាងអ្នកផ្តល់សេវាកម្មនានា ជួយដល់ជនរងគ្រោះថ្នាក់ដោយសារមីន/សំណល់ជាតិផ្ទុះពីសង្រ្គាម និងអ្នករៀបចំគោលនយោបាយ និងសហគមន៍ផ្តល់ជំនួយបានជួបពិភាក្សាគ្នាលើបញ្ហាប្រឈម ក្នុងការអនុវត្តការងារការចែករំលែកចំណេះដឹង បទពិសោធន៍ និងរួមគ្នាដោះស្រាយបញ្ហា ក្នុងន័យជួយដល់ជនរងគ្រោះថ្នាក់ដោយសារមីន/សំណល់ជាតិផ្ទុះពីសង្រ្គាម ក្រុមគ្រួសាររបស់ពួកគាត់ និងជនមានពិការភាពទូទៅ។

លោកទេសរដ្ឋមន្រ្ទី បានសំណូមពរឲ្យអង្គសិក្ខាសាលាទាំងមូល ត្រូវពិភាក្សាគ្នាឲ្យបានផុសផុលដើម្បីទទួលបាននូវធាតុចូលបន្ថែមសម្រាប់រៀបចំគោលនយោបាយ គោលការណ៍ និងកែលំអនូវសកម្មភាពរបស់យើង ក្នុងន័យជួយដល់ជនរងគ្រោះថ្នាក់ដោយសារមីន និងសំណល់ជាតិផ្ទុះពីសង្រ្គាម និងផ្នែកពិការភាព។