មន្ត្រីជាន់ខ្ពស់នៃមជ្ឈមណ្ឌលរុស្ស៊ីសម្រាប់ការផ្សះផ្សានៃភាគីប្រឆាំង នៅសាធារណរដ្ឋអារ៉ាប់ស៊ីរី បាននិយាយថា កងកម្លាំងអាកាសរុស្ស៊ី បានធ្វើការវាយប្រហារតាមអាកាសលើមូលដ្ឋានសកម្មប្រយុទ្ធចំនួន ៤ កន្លែង នៅតំបន់វាលខ្សាច់នៃតំបន់រដ្ឋបាលទីក្រុង Homs និងទីក្រុង Deir Ezzor របស់ប្រទេសស៊ីរី ក្នុង    រយៈពេល ២៤ម៉ោង កន្លងទៅនេះ។

លោក វរសេនីយ៍ឯក អូឡេក អ៊ីកណាសយូក (Oleg Ignasyuk) អនុប្រធាននៃមជ្ឈមណ្ឌលនេះ បាននិយាយថា៖« កងកម្លាំងអាកាសរុស្ស៊ី បានចាប់ផ្តើមការវាយប្រហារលើទីតាំងកំណត់អត្តសញ្ញាណចំនួន ៤កន្លែងរបស់ក្រុមសកម្មប្រយុទ្ធ ដែលបានចេញពីតំបន់ Al-Tanf»។

លោកបានបញ្ជាក់ថា ក្រុមភេរវករ Jabhat al-Nusra និងចលនាឥស្លាមនៃប្រទេសអូសបេគីស្ថាន (ក្រុមទាំងពីរនេះ ត្រូវបានហាមឃាត់ នៅក្នុងប្រទេសរុស្ស៊ី) បានបាញ់ផ្លោងទៅលើកងកម្លាំងរដ្ឋាភិបាល នៅក្នុងតំបន់បន្ធូរបន្ថយភាពតានតឹង Idlib ចំនួន ៥ដង ក្នុងរយៈពេល ២៤ម៉ោង។

លោក អ៊ីកណាសយូក បានបន្ថែមថា ការហោះហើររបស់ក្រុមចម្រុះប្រឆាំងភេរវកម្មដែលគាំទ្រអាមេរិក បានរំលោភលើដែនអាកាសស៊ីរី ក្នុងតំបន់ Al-Tanf ចំនួន ១៤ដង កាលពីថ្ងៃព្រហស្បតិ៍។ ក្នុងអំឡុងពេលថ្ងៃនោះ ក្រុមចម្រុះ ក៏បានកត់ត្រាករណីចំនួនបីនៃការរំលោភលើកិច្ចព្រមព្រៀងបន្ធូរបន្ថយជម្លោះថ្ងៃទី៩ ខែធ្នូ ឆ្នាំ ២០១៩ ទាក់ទងនឹងការហោះហើរយានដ្រូនដែលមិនមានការសម្របសម្រួលជាមួយភាគីរុស្ស៊ី។