មន្ត្រីការពារជនស៊ីវិលម្នាក់ បាននិយាយថា ភ្លៀងធ្លាក់យ៉ាងខ្លាំង ទឹកជំនន់យ៉ាងគំហុកភ្លាមៗ និងបំណាក់ដី បានធ្វើឲ្យមានការបំផ្លិចបំផ្លាញយ៉ាងធ្ងន់ធ្ងរ នៅភាគកណ្តាល និងភាគខាងត្បូងប្រទេសបូស្នី នាថ្ងៃសុក្រ (ទី៤ ខែតុលា) នេះ ដោយយ៉ាងហោចណាស់មនុស្ស ៥នាក់ ត្រូវបានគេបារម្ភថា ស្លាប់។

ទីក្រុង Jablanica ជាកន្លែង ដែលសង្ស័យថា មានអ្នកស្លាប់ ត្រូវបានកាត់ផ្តាច់ទាំងស្រុង ខណៈទឹកជំនន់យ៉ាងគំហុកភ្លាមៗ បានបំផ្លាញផ្លូវថ្នល់ និងផ្លូវរថភ្លើង។ តំបន់នេះមានចម្ងាយប្រហែល ៧០គីឡូម៉ែត្រនៃភាគនិរតីរបស់រដ្ឋធានី Sarajevo (សារ៉ាយ៉េវ៉ូ)។

លោកស្រី Majda Kovac អ្នកនាំពាក្យការិយាល័យការពារជនស៊ីវិលរបស់សហព័ន្ធ Bosniak-Croat បាននិយាយថា៖ «យោងទៅតាមព័ត៌មានមិនផ្លូវការ មនុស្ស ៥នាក់ បានបាត់បង់ជីវិត ដោយសារទឹកជំនន់»។

នៅថ្ងៃសុក្រនេះផងដែរ ការិយាល័យត្រីភាគីរបស់បូស្នី បានយល់ព្រមបញ្ជាឲ្យមានជំនួយផ្នែកយោធាសម្រាប់តំបន់ទីក្រុង Jablanica ដ៏ធំទូលាយ។ ការិយាល័យនេះបានឲ្យដឹងនៅក្នុងសេចក្តីថ្លែងការណ៍មួយថា៖ «អង្គភាពវិស្វកម្ម និងជួយសង្គ្រោះ ហើយនិងឧទ្ធម្ភាគចក្រ បានចូលរួមយ៉ាងប្រញាប់ប្រញាល់ ដើម្បីផ្តល់ជំនួយបន្ទាន់ដល់អាជ្ញាធរស៊ីវិល»។

លោកស្រី Kovac បាននិយាយថា ផ្លូវទាំងអស់ដែលធ្វើដំណើរទៅដល់តំបន់ទីក្រុង Jablanica ត្រូវបានបិទ ដោយលោកស្រីបន្ថែមថា អាជ្ញាធរបានចាប់ផ្តើមការជម្លៀសនៅក្នុងក្រុងដែលរងផលប៉ះពាល់ដោយទឹកជំនន់ ក្នុងនោះរួមទាំងមនុស្ស ១៧នាក់ នៅឯមន្ទីរពេទ្យផ្លូវចិត្តមួយផងដែ៕