នៅថ្ងៃសុក្រនេះ មនុស្សរាប់ពាន់នាក់នៅប្រទេសបង់ក្លាដែស នាំគ្នាដង្ហែក្បួនតវ៉ាក្នុងរដ្ឋធានី Dhaka ដើម្បីថ្កោលទោសការវាយប្រហាររបស់អ៊ីស្រាអែលលើប្រទេសលីបង់ និងតំបន់ហ្កាហ្សា ។

ការដង្ហែក្បួនរៀបចំឡើងដោយគណបក្សនយោបាយអ៊ីស្លាមបង់ក្លាដែស Islami Andolan មើលឃើញមនុស្សយ៉ាងច្រើន នាំគ្នាដង្ហែក្បួនតាមដងផ្លូវ ក្រោយពិធីបួងសួងថ្ងៃសុក្រ ដោយស្រែកពាក្យស្លោកប្រឆាំងអ៊ីស្រាអែល ពេលដែលពួកគេកាន់បដា និងទង់ប៉ាឡេស្ទីន ។ 

លោក Abdullah គឺជានិស្សិតវ័យ ១៨ឆ្នាំមួយរូប និយាយថា លោកចង់បានចម្លើយពីអង្គការសហប្រជាជាតិ(UN)ថាតើហេតុអ្វីបានជាជនមូស្លីមរងការវាយប្រហារម្តងហើយម្តងទៀតបែបនេះទៅវិញ ។

តំបន់មជ្ឈិមបូព៌ា ស្ថិតនៅក្នុងមាត់ជ្រោះ ស្របពេលដែលអ៊ីស្រាអែល វាយប្រហារលើតំបន់ហ្កាហ្សា និងលីបង់ ហើយនិងការកើនឡើងភាពតានតឹងរបស់សម្ព័ន្ធមិត្តសហរដ្ឋអាមេរិក ជាមួយអ៊ីរ៉ង់ ។

យោងតាមការអះអាងរបស់ក្រសួងសុខាភិបាលហ្កាហ្សា បានឲ្យដឹងថា ការវាយប្រហាររបស់អ៊ីស្រាអែលលើតំបន់ហ្កាហ្សាគ្រប់គ្រងដោយក្រុមហាម៉ាស់ បានសម្លាប់មនុស្សជាង ៤១.០០០នាក់ ៕