ឯកអគ្គរដ្ឋទូតសហភាពអឺរ៉ុប ប្រចាំនៅ Tbilisi (ប៊ីលីស៊ី) នៅថ្ងៃសុក្រ (ទី៤ ខែតុលា) បាននិយាយថា ទំនាក់ទំនងរបស់ហ្សកហ្ស៊ីជាមួយសហភាពអឺរ៉ុប (EU) នឹងកាន់តែអាក្រក់ឡើងៗ ហើយប្រទេសនេះអាចប្រឈមមុខនឹងទណ្ឌកម្ម ប្រសិនបើខ្លួនងាកចេញពីលទ្ធិប្រជាធិបតេយ្យ។

លោក Pawel Herczynski បានលើកឡើងថា EU ត្រូវបានរៀបចំឲ្យធ្វើការជាមួយរដ្ឋាភិបាលជាប់ឆ្នោតតាមបែបប្រជាធិបតេយ្យណាមួយ នៅហ្សកហ្ស៊ីដែលត្រូវរៀបចំការបោះឆ្នោតសភា នៅថ្ងៃទី២៦ ខែតុលា។ ប៉ុន្តែលោកបាននិយាយថា ខ្លួននឹងមិនទទួលយកប្រទេសតំបន់ South Caucasus ជាសមាជិកនោះទេ ប្រសិនបើប្រទេសនេះ ក្លាយជា «រដ្ឋឯកបក្ស» ដោយគ្មានការជំទាស់ផ្នែកនយោបាយ។

លោក Herczynski បានប្រាប់អ្នកសារព័ត៌មាន នៅទីក្រុង Tbilisi ថា៖ «សម្រាប់ពេលនេះ មានលទ្ធភាពពីការដាក់ទណ្ឌកម្ម នាពេលអនាគត ក្នុងករណីដែលអ្វីៗ នឹងដើរផ្ទុយពីការបោះឆ្នោត»។

គួរបញ្ចាក់ថា EU កាលពីឆ្នាំមុន បានផ្តល់ឋានៈបេក្ខភាពដល់ប្រទេសហ្សកហ្ស៊ី ដែលជាដំណាក់កាលដំបូងឆ្ពោះទៅរកការទទួលបានសមាជិកភាព នៅទីបំផុត។ ប៉ុន្តែទំនាក់ទំនងមានសភាពកាន់តែអាក្រក់ទៅៗ គិតចាប់តាំងពីគណបក្សកាន់អំណាច Georgian Dream បានអនុម័តច្បាប់ «ភ្នាក់ងារបរទេស» កាលពីខែឧសភា ដែលអ្នករិះគន់និយាយថា គឺជាភស្តុតាងដែលបង្ហាញថា ប្រទេសនេះកំពុងបែរខ្នងដាក់លោកខាងលិច ហើយងាកទៅរករុស្ស៊ី៕