បាល់ទាត់៖ ជំនួបរវាងក្រុមការពារតំណែងជើងឯកបឹងកេត និងក្រុមជើងឯករងឆ្នាំចាស់ព្រះខ័នរាជស្វាយរៀងបានត្រឹមចែកគ្នា ១ពិន្ទុម្នាក់ប៉ុណ្ណោះក្រោយប្រកួតស្មើគ្នា ១-១ ក្នុងជំនួបជើងទី២ នៃលីគកំពូលកម្ពុជានៅកីឡដ្ឋានខេមបូឌាអ៊ែរវ៉េកាលពីល្ងាចថ្ងៃទី៣០ ខែកញ្ញា ឆ្នាំ២០២១។
ជំនួបដ៏ជក់ចិត្តក្នុងសប្ដាហ៍ទី១៧ នេះ វគ្គទី១ ក្រុមទាំងពីរមិនអាចបំប៉ោងសំណាញ់ទីគ្នាបានឡើយ។ តែក្រោយចូលវគ្គទី២ បានប្រមាណ ៤នាទី ព្រះខ័នរាជស្វាយរៀងមានឱកាសបើកការនាំមុខ ១គ្រាប់មុនដោយការទាត់បាល់ពិន័យ ១១ម៉ែត្ររបស់ខ្សែប្រយុទ្ធ Lopez Mendy នៅនាទី៤៩ បន្ទាប់ពីបាល់ប៉ះដៃកីឡាករ Abee Hurber ក្នុងប្រអប់គ្រោះថ្នាក់។ ក្រោយមានគ្រាប់បាល់កើតឡើង ក្រុមទាំងពីរបានព្យាយាមវាយសម្រុកគ្នាកាន់តែខ្លាំង ខណៈនៅនាទី៧៩ ដោយការបោះបាល់ភ្លាត់ពីអ្នកចាំទី អាំ សុវណ្ណារ៉ាត់ បានបង្កឱកាសឲ្យខ្សែប្រយុទ្ធវ័យក្មេង សៀង ចន្ធា បណ្ដើរបាល់រហូតស៊ុតគ្រាប់តាមស្មើ ១-១ ឲ្យក្រុមនាគខៀវបឹងកេតវិញ ហើយលទ្ធផលនេះក៏បានរក្សារហូតដល់ចប់ការប្រកួតពេញម៉ោងតែម្ដង។
ការចែកគ្នា ១ពិន្ទុម្នាក់នេះ បានធ្វើឲ្យព្រះខ័នរាជស្វាយរៀងរបូតកៅអីកំពូលតារាងបណ្ដោះអាសន្ន ដោយធ្លាក់មកឈរលេខ២ និងមាន ៣៥ពិន្ទុតាមពីក្រោយក្រុមកំពូលតារាងភ្នំពេញក្រោន ២ពិន្ទុបន្ទាប់ពីប្រកួត ១៦លើកដូចគ្នា ខណៈក្រុមជើងឯក ៤សម័យបឹងកេតបានធ្លាក់ទៅឈរលេខ៤ បណ្ដោះអាសន្នដោយមាន ៣៤ពិន្ទុស្មើក្រុមឈរលេខ៣ វិសាខា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
