ការិយាល័យសិទ្ធិមនុស្សរបស់អង្គការសហប្រជាជាតិ (OHCHR) បាននិយាយកាលពីថ្ងៃសុក្រថា រដ្ឋាភិបាលប្រទេសហៃទី បានថ្កោលទោសការវាយប្រហារដ៏បង្ហូរឈាមដោយក្រុម Gran Grif នៅទីក្រុង Pont-Sande ប្រទេសហៃទី បណ្តាលឱ្យមនុស្សយ៉ាងហោចណាស់៧០នាក់ស្លាប់។

នៅក្នុងសេចក្តីថ្លែងការណ៍មួយលើបណ្តាញផ្សព្វផ្សាយសង្គម ការិយាល័យរបស់នាយករដ្ឋមន្ត្រី លោក Garry Conille មានកំហឹងយ៉ាងខ្លាំង ជុំវិញការវាយប្រហារនេះ ដោយបានចាត់ទុកថាជា «អំពើដ៏ឃោរឃៅ មិនអាចនិយាយបាន»។

ការវាយប្រហារនេះ បានដាក់គោលដៅលើជនស៊ីវិលក្នុងនោះមានស្ត្រី និងកុមារ ហើយបានបណ្តាលឱ្យមនុស្សជាច្រើននាក់ទៀត រងរបួស ។

សេចក្តីថ្លែងការណ៍បាននិយាយថា «អំពើហិង្សាលើជនស៊ីវិលស្លូតត្រង់ គឺមិនអាចទទួលយកបាន ហើយទាមទារឱ្យមានការឆ្លើយតបបន្ទាន់»។

រដ្ឋាភិបាល បានប្តេជ្ញាតាមចាប់អ្នកវាយប្រហារ និងនាំពួកគេទៅកាត់ទោស និងបានសន្យាចំពោះកិច្ចសប្រតិបត្តិការជាអន្តរជាតិ ដើម្បីស្ដារសន្តិភាព នៅក្នុងតំបន់។

អ្នកនាំពាក្យការិយាល័យសិទ្ធិមនុស្សរបស់អង្គការសហប្រជាជាតិ បានបញ្ជាក់កាលពីថ្ងៃសុក្រថា មនុស្សយ៉ាងហោចណាស់៧០នាក់ត្រូវបានសម្លាប់នៅក្នុងការវាយប្រហារនេះ ជាការបង្ហាញពីសោកនាដកម្មមួយផ្សេងទៀតនៅក្នុងវិបត្តិអំពើហិង្សា ដែលកំពុងបន្តនៅក្នុងប្រទេសហៃទី។