​បាញ់​ព្រួញ​៖ ​កីឡា​ការិនី​អាល្លឺម៉ង់ Lisa Unruh បាន​យកឈ្នះ​កីឡា​ការិនី​រុស្ស៊ី Elena Osipova ក្នុង​វគ្គ Shoot-Off ផ្តាច់ព្រ័ត្រ ដើម្បី​គ្រង​ជើងឯក​ការប្រកួត​បាញ់​ព្រួញ​ជើងឯក​ពិភពលោកដែល​រៀបចំ​នៅ​សហរដ្ឋអាមេរិក​។

​​Lisa Unruh បាន​ក្លាយជា​កីឡាការិនី​អាល្លឺម៉ង់​ទី១ ដែល​ឈ្នះ​មេដាយមាស​ក្នុង​ព្រឹត្តិការណ៍​បាញ់​ព្រួញ​ជើងឯក​ពិភពលោក​នេះ បន្ទាប់ពី​កន្លងមក​ធ្លាប់តែ​បាន​មេដាយប្រាក់​ក្នុង​ព្រឹត្តិការណ៍​អូឡាំពិក ២លើកចុងក្រោយ​។​ ​​មុន​កីឡាការិនី Lisa Unruh កីឡាការិនី​អាល្លឺម៉ង់​មួយរូប​ទៀត Michelle Kroppen បាន​យកឈ្នះ​មេដាយ​សំរឹទ្ធ​ក្នុង​ព្រឹត្តិការណ៍​ពិភពលោក​នេះ ​ដែល​ធ្វើឱ្យ​នាង​ជា​កីឡាការិនី​អាល្លឺម៉ង់​ទី១ ធ្វើបាន​បែបនេះ មុនពេល​ដែល Lisa Unruh ធ្វើបាន​កាន់តែ​ល្អ​ដោយ​យក​មេដាយមាស​តែម្តង​។

​​ងាក​មក​ការប្រកួត​ផ្នែក​បុរស​វិញ កីឡាករ​ម្ចាស់ផ្ទះ​អាមេរិក Jack Williams ក៏បាន​ក្លាយជា​កីឡាករ​អាមេរិក​ដំបូង​គេ​ដែរ ​ដែល​ឈ្នះ​ជើងឯក​បាញ់​ព្រួញ​ពិភពលោក​នៅលើ​ទឹកដីរ​បស់​ខ្លួន បន្ទាប់ពី​យកឈ្នះ​ជើងឯក ៥​សម័យ Brady Elliot នៅ​វគ្គ​ផ្តាច់ព្រ័ត្រ​។ ​ចំណែក​មេដាយ​សំរឹទ្ធ​បាន​ទៅ​កីឡាករ​ទួរគី Mete Gazoz ក្រោយ​យកឈ្នះ​កីឡាករ​ឥណ្ឌា Atanu Das៕

​អត្ថបទ​៖​នាង សុភា​វុ​ធ