កំពង់ធំ ៖ ប្រជាពលរដ្ឋនៅតាមមូលដ្ឋាន ក្នុងភូមិសាស្រ្តខេត្តកំពង់ធំ នៅតែបន្តរៀបចំអុំទូកតាមទំនៀមទម្លាប់របស់ខ្លួន ជារៀងរាល់ឆ្នាំក្រោយពីធីបុណ្យភ្ជំបិណ្ឌរួច ជាមួយគ្នានេះ អភិបាលខេត្តកំពង់ធំ អំពាវនាវប្រជាពល រដ្ឋនៅតាមមូលដ្ឋានបន្តរក្សាទំនៀមទំលាប់ប្រពៃណីអុំទូករបស់ខ្លួនឱ្យបានគង់វង្ស។ 

​នៅថ្ងៃទី៥ ខែតុលា ឆ្នាំ២០២៤ ឯឧត្តម នួន ផារ័ត្ន អភិបាលខេត្តកំពង់ធំ ដឹកនាំសហការីចូលរួមពិធី អុំទូក នៅស្ទឹងស្ទោង ក្នុងស្រុកស្ទោង ខេត្តកំពង់ធំ។ 

ក្នុងឱកាសនោះ ឯកឧត្តម អំពាវនាវដល់ប្រជាពលរដ្ឋទាំងអស់ បន្តថែក្សាទំនៀមទម្លាប់នេះ ឲ្យគង់វង្សនៅមូលដ្ឋានរបស់ខ្លួន។ ឯកឧត្តម បន្តថា ការរៀបចំពិធីអុំទូក មិនត្រឹមតែបង្ករភាពសប្បាយរីករាយជូនបងប្អូនប្រជាពលរដ្ឋប៉ុណ្ណោះនោះទេ ប៉ុន្តែក៏ជាការអបអរសាទរពិធីបុណ្យភ្ជំបិណ្ឌ និងការថែរក្សាទំនៀមទម្លាប់ ប្រពៃណី ដូនតារបស់ខ្មែរ ដែលបានបន្សល់ទុកតាំងពីបុរាណមក។ 

ពិធីអុំទូកនេះ ក៏ជារំលឹកគុណដល់ជើងទឹក ដែលពលីជីវិត ក្នុងបុព្វហេតុការពារ ថែរក្សា បូរណភាពទឹក គ្រប់សម័យកាល ហើយរាជរដ្ឋាភិបាលកម្ពុជា ក៏បានដាក់ពិធីបុណ្យអ៊ុទូក បណ្តែតប្រទីប អកអ៊ុបុក និងសំពះខែ ជាពិធីបុណ្យជាតិ សម្រាប់ប្រជាពលរដ្ឋខ្មែរគ្រប់រូបផងដែរ។ ទន្ទឹមជាមួយគ្នានេះ ដើម្បីថែរក្សាទំនៀមទម្លាប់ ប្រពៃជាតិ រដ្ឋបាលខេត្តកំពង់ធំ គ្រោងនឹងរៀបចំពិធីបុណ្យអុំទូកថ្នាក់ខេត្ត នៅថ្ងៃទី១៦-១៧ ខែតុលា ខាងមុខ ដែលកម្មវិធី នឹងមានតាំងពិពណ៌ទំនិញជាច្រើនប្រភេទ ការបាញ់កាំជ្រួច ប្រគំតន្រ្តី និងបណ្តែតប្រទីប ផងដែរ។ ឯកឧត្តម អំពាវនាវដល់ប្រជាពលរដ្ឋ ភ្ញៀវទេសចរណ៍ជាតិ និងអន្តរជាតិទាំងអស់ សូមអញ្ជើញមកទស្សនាកំសាន្ត នូវពិធីបុណ្យអុំទូកនេះ ប្រកបដោយភាពសប្បាយរីករាយ និងមានការទទួលខុសត្រូវខ្ពស់។ 

 ជាមួយគ្នានេះ លោក សាយ គឹមឡម អភិបាលស្រុកស្ទោង ធ្វើរបាយការណ៍បញ្ជាក់ថា ពិធីប្រណាំងទូកនាឱកាសនេះ មានទូកចូលរួមសរុប ចំនួន៤៧ទូក ភាគច្រើនជាប្រភេទូកផ្កាចារ្យ ដែលមានការ តុបតែងប្លែកផ្សេងៗគ្នា។ ហើយត្រូវបានប្រជាពលរដ្ឋ ជឿជាក់ថា ការតុបតែងទាំងអស់នេះ ដើម្បីនាំនូវសេចក្តី សុខ សាមគ្គីភាព បញ្ជៀសជំងឺដង្កាត់ គ្រោះធម្មជាតិ និងនាំមកនូវការអភិវឌ្ឍមូលដ្ឋានជូនដល់ប្រជាពលរដ្ឋ នៅក្នុងស្រុកស្ទោងទាំងមូលផងដែរ។