ការិយាល័យប្រព័ន្ធផ្សព្វផ្សាយរបស់រដ្ឋាភិបាលក្រុមហាម៉ាស ដែលគ្រប់គ្រងតំបន់ហ្កាហ្សា បាននិយាយថា យ៉ាងហោចណាស់មនុស្ស ២៤នាក់បានស្លាប់ និង ៩២នាក់ផ្សេងទៀតបានរងរបួស នៅពេលដែលការវាយប្រហារតាមអាកាសរបស់អ៊ីស្រាអែល បានកំណត់គោលដៅទៅលើវិហារអ៊ីស្លាមមួយ និងសាលារៀនមួយកន្លែងសម្រាប់ជនភៀសខ្លួននៅក្នុងតំបន់ហ្កាហ្សាស្ទ្រីប នៅព្រឹកថ្ងៃអាទិត្យ (០៦ តុលា) នេះ។

ការវាយប្រហារលើវិហារអ៊ីស្លាម និងសាលារៀន នៅជិតមន្ទីរពេទ្យ អាល់-អាកសា (Al-Aqsa) ក្នុងទីក្រុង ដឺ អាល់-បាឡា (Deir al-Balah) ភាគកណ្តាលហ្កាហ្សាស្ទ្រីបនេះ បានកើតឡើងនៅពេលដែលសង្រ្គាមរវាងអ៊ីស្រាអែល និងក្រុមសកម្មប្រយុទ្ធប៉ាឡេស្ទីន ហាម៉ាស នៅក្នុងតំបន់ហ៊ុមព័ទ្ធជិតដល់ខួបមួយឆ្នាំ។

នៅក្នុងសេចក្តីថ្លែងការណ៍ យោធាអ៊ីស្រាអែលនិយាយថា ខ្លួនបានធ្វើ “ការវាយប្រហារយ៉ាងជាក់លាក់លើពួកភេរវករហាម៉ាស” ដែលកំពុងប្រតិបត្តិការនៅក្នុងមជ្ឈមណ្ឌលបញ្ជា និងគ្រប់គ្រងដែលបានបង្កប់នៅក្នុងសាលា អ៊ីប៊ីន រូស (Ibn Rushd) និងវិហារអ៊ីស្លាម ស៊ូហាដា អាល់-អាកសា (Shuhada al-Aqsa) ក្នុងតំបន់ ដឺ អាល់-បាឡា។

ការបង្ហូរឈាមចុងក្រោយបំផុតនៅក្នុងជម្លោះអ៊ីស្រាអែល-ប៉ាឡេស្ទីន ដែលមានរយៈពេលជាច្រើនទសវត្សរ៍នេះ ត្រូវបានបញ្ឆេះឡើងនៅពេលដែលក្រុមហាម៉ាស វាយប្រហារភាគខាងត្បូងអ៊ីស្រាអែល កាលពីថ្ងៃទី០៧ ខែតុលា ឆ្នាំ២០២៣ ដោយបានសម្លាប់មនុស្សចំនួនប្រមាណ ១.២០០នាក់ និងចាប់មនុស្សប្រហែល ២៥០នាក់ធ្វើជាចំណាប់ថ្នូរ នេះបើយោងតាមតួលេខសរុបរបស់អ៊ីស្រាអែល។ 

ក្រសួងសុខាភិបាលរបស់ហ្កាហ្សា បានឱ្យដឹងថា ការវាយលុកយោធាសងសឹកជាបន្តបន្ទាប់របស់អ៊ីស្រាអែល ទៅលើតំបន់ហ្កាហ្សា បានសម្លាប់ប្រជាជនប៉ាឡេស្ទីនប្រមាណជិត ៤២.០០០នាក់៕