អាហ្វហ្គានីស្ថាន៖ មន្ត្រីជាន់ខ្ពស់កាកបាទក្រហមបានព្រមានកាលពីថ្ងៃព្រហស្បតិ៍ ទី៣០ ខែកញ្ញាថា ប្រព័ន្ធសុខាភិបាលរបស់អាហ្វហ្គានីស្ថានកំពុងឈានដល់ការដួលរលំ ដោយនិយាយថា មណ្ឌលសុខភាពជាង ២.០០០កន្លែងត្រូវបានបិទនៅទូទាំងប្រទេស។
សហព័ន្ធកាកបាទក្រហម និងអឌ្ឍចន្ទក្រហមអន្តរជាតិ (IFRC) បានព្រមានថា ការខ្វះខាតថវិកាយ៉ាងធ្ងន់ធ្ងរកំពុងរុញទម្លាក់ ប្រព័ន្ធសុខាភិបាលរបស់អាហ្វហ្គានីស្ថានឲ្យដួលរលំ។ លោក Alexander Matheou នាយកប្រចាំតំបន់អាស៊ីប៉ាស៊ីហ្វិករបស់សហព័ន្ធកាកបាទក្រហម និងអឌ្ឍចន្ទក្រហមអន្តរជាតិបានប្រាប់សន្និសីទសារព័ត៌មាននៅរដ្ឋធានីកាប៊ុលថា ក្រុមបុគ្គលិកពេទ្យអាចយល់ព្រមធ្វើការដោយគ្មានប្រាក់ខែពីរបីសប្តាហ៍ទៀតប៉ុណ្ណោះ។ ប៉ុន្តែនៅពេលថ្នាំសង្កូវអស់ទាំងស្រុង ប្រសិនបើអ្នកមិនអាចបើកភ្លើងបានទេ ប្រសិនបើអ្នកគ្មានអ្វីផ្តល់ជូនទៅនរណាម្នាក់ដែលមកគ្លីនិករបស់អ្នកទេនោះ ពួកគេនឹងបិទទ្វារ។
ដោយត្រូវបានបំផ្លិចបំផ្លាញដោយសង្គ្រាមជាង ៤ទសវត្សរ៍ សេដ្ឋកិច្ចអាហ្វហ្គានីស្ថានត្រូវបាន ងាប់ទាំងស្រុង ចាប់តាំងពីការកាន់កាប់របស់ក្រុមឧទ្ទាមតាលីបង់កាលពីខែមុន ខណៈរងការដាក់ទណ្ឌកម្ម និងការកាត់ផ្តាច់ជំនួយបរទេសផង។ លោក Alexander Matheou បាននិយាយថា បុគ្គលិកសុខាភិបាលជាង ២០.០០០នាក់នៅក្នុងប្រទេសលែងឈប់ធ្វើការ ឬកំពុងធ្វើការដោយមិនទទួលបានប្រាក់ខែ។ ជាង ៧.០០០នាក់ក្នុងចំណោមពួកគេគឺជាស្ត្រី៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
