ប្រទេសចិន បានជំរុញឱ្យគណៈកម្មាការអ៊ឺរ៉ុប វិលរកផ្លូវត្រឹមត្រូវនៃការដោះស្រាយជម្លោះពាណិជ្ជកម្មតាមរយៈការពិគ្រោះយោបល់ បន្ទាប់ពីរដ្ឋជាសមាជិកសហភាពអឺរ៉ុប បានបោះឆ្នោតគាំទ្រកាលពីថ្ងៃសុក្រ (០៤ តុលា) ដើម្បីដាក់ពន្ធខ្ពស់លើរថយន្តអគ្គិសនីដើរដោយថាមពលថ្ម (EV) ដែលផលិតនៅក្នុងប្រទេសចិន។

ក្រសួងពាណិជ្ជកម្មចិន បាននិយាយកាលពីថ្ងៃសុក្រថា ជំហានរបស់សហភាពអឺរ៉ុប ក្នុងការបង្កើនពន្ធលើរថយន្ត EV ដែលនាំចូលពីចិន នឹងមិនត្រឹមតែបរាជ័យក្នុងការដោះស្រាយបញ្ហាណាមួយនោះទេ ប៉ុន្តែថែមទាំងធ្វើឱ្យទំនុកចិត្តរបស់ក្រុមហ៊ុនចិនដែលចង់វិនិយោគ និងសហការជាមួយដៃគូសហភាពអឺរ៉ុប ចុះខ្សោយផងដែរ។

នៅថ្ងៃដដែលនោះ សភាពាណិជ្ជកម្មចិន ដែលមានមូលដ្ឋាននៅទីក្រុងប្រ៊ុចសែល បានជំរុញឱ្យប្លុកអឺរ៉ុបដែលមានសមាជិក ២៧រដ្ឋនេះ ធ្វើសកម្មភាពដោយប្រយ័ត្នប្រយែងដោយការពន្យារពេលពន្ធគយ និងផ្តោតលើការដោះស្រាយជម្លោះ និងការខ្វែងគំនិតគ្នាតាមរយៈការពិភាក្សា។ 

ការបោះឆ្នោតដើម្បីដាក់ពន្ធរហូតដល់ ៤៥% លើពន្ធនាំចូលដែលមានស្រាប់នេះ កើតឡើងបន្ទាប់ពីការស៊ើបអង្កេតប្រឆាំងនឹងការឧបត្ថម្ភធនរបស់សហភាពអឺរ៉ុប ដែលបានសន្និដ្ឋានថាការនាំចូលរថយន្ត EV ពីចិន បានធ្វើឱ្យខូចទីផ្សារអឺរ៉ុប។

ទោះបីជាមានការបោះឆ្នោតកាលពីថ្ងៃសុក្រក៏ដោយ ចិនបាននិយាយថា ខ្លួនបើកចំហចំពោះការចរចាដើម្បីឈានដល់កិច្ចព្រមព្រៀង និងបញ្ចៀសការដាក់ពន្ធសងសឹកខ្ពស់ជាងនេះ។ បណ្ដាប្រទេសដូចជាអាល្លឺម៉ង់ និងហុងគ្រី បានសម្តែងការប្រឆាំងយ៉ាងខ្លាំងចំពោះលទ្ធផលបោះឆ្នោតដំឡើងពន្ធ ហើយក្រុមហ៊ុនផលិតរថយន្ត រួមទាំងក្រុមហ៊ុន ម៉ាកសឺដេស-បេនស៍ (Mercedes-Benz) បានព្រមានថា វិធានការតបតវិញអាចធ្វើឱ្យប៉ះពាល់ដល់ការប្រកួតប្រជែងរបស់ឧស្សាហកម្មនេះក្នុងរយៈពេលវែង៕