​ប្រដាល់​សកល៖ ​ការប្រកួត​កីឡា​ប្រដាល់​សកល​ នៅ​ក្នុង​ព្រឹត្តិការណ៍​កីឡា​អូឡាំពិក​រដូវក្តៅ​ទីក្រុង Rio ប្រទេស​ប្រេ​ស៊ី​ល​កាលពី​ឆ្នាំ​២០១៦ មួយ​ចំនួន​ត្រូវ​បាន​គេ​ស៊ើបអង្កេត​ឃើញ​ថា ​មាន​អំពើពុករលួយ​រៀបចំ​លទ្ធផល​ទុកជាមុន​។ ​​ការប្រកួត​វិញ្ញាសា​ប្រដាល់​សកល កីឡាករ​អៀក​ឡង់ Michael Conlan និង​កីឡាករ​រុស្ស៊ី Vladimir Nikitin ត្រូវ​បាន​គេ​ដឹង​ថា​មិន​ប្រក្រតី​។​

​​ក្រុម​ស៊ើបអង្កេត​ដែល​មាន​លោក Richard McLaren ត្រូវ​បាន​តែង​តាំង​ដោយ​សមាគម​កីឡាប្រដាល់​អន្តរជាតិ AIBA ហើយក៏​រក​ឃើញ​ថា ​មន្ត្រី​អាជ្ញា​កណ្តាល និង​ចៅក្រម​ទាំង​ប៉ុន្មាន​នាក់​នោះ​សុទ្ធតែ​នៅ​ពីក្រោយ​ការរៀបចំ​លទ្ធផល​ទុកជាមុន​នោះ​។​ ​​ការប្រកួត​នោះ​ជ័យជំនះ​បាន​ទៅ​កីឡាករ​រុស្ស៊ី Vladimir Nikitin ដែល​ធ្វើឱ្យ​គូប្រកួត Michael Conlan នោះ​ខក​បំណង ​និង​ឈាន​ដល់​បង្ហាញ​ម្រាមដៃ​កណ្តាល​ទៅ​គូភាគី ដោយ​គេ​ដឹង​​ច្បាស់​ថា ​ពិត​ជាមាន​អំពើពុករលួយ​នៅ​ពីក្រោយ​ការដាក់​ពិន្ទុ​។​ ​​Conlan គឺជា​ម្ចាស់​ជើងឯក​ពិភពលោក និង​អឺរ៉ុប​នៅពេលនោះ តែ​បរាជ័យ​នៅ​ថ្វីដៃ Vladimir Nikitin នោះ​ហាក់ដូចជា​ផុយស្រួយ​។

​​មិន​ត្រឹមតែ​ប្រកួត​មួយគូ​នេះ​ទេ ជំនួប​រវាង​កីឡាករ​រុស្ស៊ី Evgeny Tischenko និង​កីឡាករ​កា​ហ្សា​ក់​ស្ថាន Vasily Levit វគ្គ​ផ្តាច់ព្រ័ត្រ​ដណ្តើម​មេដាយមាស​ទំងន់​ធ្ងន់ ការប្រកួត​វគ្គ​ផ្តាច់ព្រ័ត្រ​រវាង​កីឡាករ​អង់គ្លេស​ Joe Joyce និង កីឡាករ​បារាំង Tony Yoka និង​ការប្រកួត​មួយចំនួនទៀត​សុទ្ធ​តែមាន​បញ្ហា​៕

​អត្ថបទ​៖​នាង សុភា​វុ​ធ