ក្រុមមន្ត្រីបាននិយាយកាលពីថ្ងៃអាទិត្យ (០៦ តុលា) ថា យ៉ាងហោចណាស់មនុស្ស ៥នាក់បានស្លាប់ និងជាង ១០០.០០០នាក់ទៀតរងផលប៉ះពាល់ដោយសារទឹកជំនន់ដ៏បំផ្លិចបំផ្លាញ ដែលបង្កឡើងដោយភ្លៀងធ្លាក់ខ្លាំង និងទឹកទន្លេជោរជន់បន្តវាយលុកភាគខាងជើងបង់ក្លាដែស។

នៅតំបន់ សឺពួរ (Sherpur) ដែលជាតំបន់ភាគខាងជើងរងគ្រោះខ្លាំងបំផុត កម្រិតទឹកនៃទន្លេធំៗបានហក់ឡើងយ៉ាងគ្រោះថ្នាក់ ធ្វើឱ្យជន់លិចទឹកតំបន់ថ្មីៗជាច្រើន និងបង្ខំឱ្យមនុស្សរាប់ពាន់គ្រួសារត្រូវជម្លៀសខ្លួន។

អាជ្ញាធរមូលដ្ឋានបារម្ភពីការខូចខាតយ៉ាងទូលំទូលាយដល់វិស័យកសិកម្ម ដោយផលដំណាំ និងដីស្រែចម្ការ ជាពិសេសស្រែប្រឈមនឹងការបំផ្លិចបំផ្លាញខ្លាំងបំផុត។ លំនៅឋាន និងផ្លូវថ្នល់ជាច្រើនស្ថិតនៅក្រោមទឹកជាច្រើនម៉ែត្រ ដោយកាត់ផ្តាច់ភូមិ និងធ្វើឱ្យអ្នកស្រុកមិនអាចទទួលបានការសង្គ្រោះ។

បុគ្គលិកទ័ព បានប្រើប្រាស់ទូក និងឧទ្ធម្ភាគចក្រ ដោយចូលរួមក្នុងកិច្ចខិតខំប្រឹងប្រែងជួយសង្គ្រោះ ផ្តល់ការផ្គត់ផ្គង់បន្ទាន់ និងជម្លៀសអ្នកដែលជាប់គាំងដោយទឹកជំនន់។ ស្ពានជាច្រើនបានបាក់រលំ ហើយផ្លូវត្រូវលិចទឹក ដែលធ្វើឱ្យអាជ្ញាធរមូលដ្ឋានពិបាកទៅដល់តំបន់រងគ្រោះ។

នៅពេលដែលកម្រិតទឹកបន្តកើនឡើង ក្តីបារម្ភក៏កាន់តែខ្លាំងពីផលប៉ះពាល់រយៈពេលវែងលើវិស័យកសិកម្មក្នុងតំបន់ ជាពិសេសដំណាំស្រូវ។ ប្រសិនបើទឹកជំនន់មិនស្រកក្នុងពេលឆាប់ៗទេ ផលប៉ះពាល់សេដ្ឋកិច្ចរបស់កសិករអាចនឹងធ្ងន់ធ្ងរ៕