ប្រធានជនភៀសខ្លួនរបស់អង្គការសហប្រជាជាតិ លោក Filippo Grandi បាននិយាយ កាលពីថ្ងៃអាទិត្យ ទី៦ ខែតុលា ថា ការវាយប្រហារជាច្រើនលើក លើប្រទេសលីបង់ បានរំលោភលើច្បាប់មនុស្សធម៌អន្តរជាតិ ដោយយោងជាក់ស្តែងចំពោះការបាញ់ផ្លោងរបស់អ៊ីស្រាអែលលើតំបន់ធំៗរបស់ប្រទេស។

លោក បានប្រាប់ប្រព័ន្ធផ្សព្វផ្សាយនៅទីក្រុងបេរូតថា «ករណីជាច្រើននៃការរំលោភលើច្បាប់មនុស្សធម៌អន្តរជាតិ ស្ថិតក្នុងរបៀបដែលការវាយប្រហារតាមអាកាសត្រូវបានធ្វើឡើង ដែលបានបំផ្លាញ ឬធ្វើឲ្យខូចខាតហេដ្ឋារចនាសម្ព័ន្ធស៊ីវិល បានសម្លាប់ជនស៊ីវិល និងបានធ្វើឲ្យប៉ះពាល់ដល់ប្រតិបត្តិការមនុស្សធម៌»។

លោក បានបញ្ជាក់ពីតម្រូវការសុវត្ថិភាពក្នុងសកម្មភាពបុគ្គលិកមនុស្សធម៌ និងការការពារហេដ្ឋារចនាសម្ព័ន្ធស៊ីវិល ដែលត្រូវបានបំផ្លាញយ៉ាងធ្ងន់ធ្ងរដោយការវាយប្រហារ។

លោក Grandi ស្ថិតនៅក្នុងប្រទេសលីបង់ ខណៈប្រទេសនេះព្យាយាមទប់ទល់ទៅនឹងការភៀសខ្លួនរបស់ប្រជាជនជាង១,២លាននាក់ បណ្តាលមកពីប្រតិបត្តិការតាមអាកាស និងជើងគោករបស់អ៊ីស្រាអែល ដែលត្រូវបានពង្រីក ខណៈខ្លួននិយាយថាកំពុងផ្តោតគោលដៅលើក្រុមហេសបូឡាគាំទ្រដោយអ៊ីរ៉ង់។

លោកនិយាយថា «យើងពិតជាត្រូវការបទឈប់បាញ់មួយ ឲ្យបានឆាប់រហ័ស» យើងពិតជាត្រូវការការអំពាវនាវឱ្យមានបទឈប់បាញ់ ដែលអគ្គលេខាធិការ និងរដ្ឋជាច្រើនបានធ្វើការអំពាវនាវចំពោះភាគីជម្លោះ ដូចជានៅតំបន់ហ្កាហ្សាដែរ។

ក្រសួងសុខាភិបាលប្រទេសលីបង់ បាននិយាយថា មនុស្សជាង ២.០០០នាក់ត្រូវបានសម្លាប់ និងជិត ១០.០០០នាក់ បានរងរបួសនៅក្នុងប្រទេសលីបង់ ក្នុងរយៈពេលជិតមួយឆ្នាំនៃការប្រយុទ្ធគ្នា ដែលភាគច្រើនបំផុតក្នុងរយៈពេលពីរសប្តាហ៍កន្លងទៅនេះ។