យោធាអ៊ីស្រាអែល បាននិយាយនៅថ្ងៃចន្ទ (០៧ តុលា) ដែលជាគម្រប់ខួបមួយឆ្នាំនៃការវាយប្រហាររបស់ក្រុមហាម៉ាសកាលពីឆ្នាំមុនថា ក្នុងយុទ្ធនាការយោធាមួយឆ្នាំកន្លងទៅនេះនៅតំបន់ហ្កាហ្សាស្ទ្រីប អ៊ីស្រាអែល បានទម្លាក់គ្រាប់បែកលើជាង ៤០.០០០គោលដៅ បានរកឃើញកំណាត់ផ្លូវរូងក្រោមដីចំនួន ៤.៧០០កន្លែង និងបំផ្លាញទីតាំងបាញ់រ៉ូកែតចំនួន ១.០០០កន្លែង។

យោធានិយាយថា ទាហានអ៊ីស្រាអែលចំនួន ៧២៦នាក់ ត្រូវបានសម្លាប់ចាប់តាំងពីថ្ងៃទី០៧ ខែតុលា ឆ្នាំ ២០២៣ ដោយក្នុងចំណោមនោះ មាន ៣៨០នាក់ ស្លាប់ក្នុងការវាយប្រហារថ្ងៃ០៧ តុលា និង ៣៤៦នាក់ស្លាប់ក្នុងការប្រយុទ្ធនៅតំបន់ហ្កាហ្សា ដែលចាប់ផ្តើមពីថ្ងៃទី២៧ ខែតុលា ឆ្នាំ២០២៣។ ទាហានដែលរងរបួសមានចំនួន ៤.៥៧៦នាក់ ចាប់តាំងពីកាលបរិច្ឆេទនោះមក។

នៅក្នុងទិន្នន័យជាការប្រារព្ធខួបលើកទី១ នៃការវាយប្រហារ៧តុលានោះ យោធាអ៊ីស្រាអែល និយាយថា ខ្លួនបានចុះឈ្មោះទ័ពបម្រុងចំនួន ៣០០.០០០នាក់ចាប់តាំងពីការចាប់ផ្តើមនៃសង្រ្គាម ដែលរួមមានបុរស ៨២% និងស្ត្រី ១៨% និងជិតពាក់កណ្តាលនៃពួកគេ មានអាយុពី ២០ ទៅ ២៩ឆ្នាំ។

យោធាបន្ថែមថា ខ្លួនបានសម្លាប់មេបញ្ជាការកងពលតូចសកម្មប្រយុទ្ធនៅហ្កាហ្សា ចំនួន ៨នាក់ មេបញ្ជាការកងវរសេនាតូចប្រហែល ៣០នាក់ និងមេបញ្ជាការក្រុមប្រយុទ្ធចំនួន ១៦៥នាក់ក្នុងរយៈពេលមួយឆ្នាំកន្លងមកនេះ ប៉ុន្តែមិនបានបញ្ជាក់តួលេខអ្នកស្លាប់របស់អង្គភាពប្រយុទ្ធនៃក្រុមហាម៉ាសទេ៕