និយ័តករមូលបត្រកម្ពុជា នៅថ្ងៃទី៧ ខែតុលា ឆ្នាំ២០២៤នេះ សហការជាមួយក្រសួង​ប្រៃសណីយ៍ និងទូរគមនាគមន៍ បានរៀបចំសិក្ខាសាលាកសាងសមត្ថភាពស្ដីពី “សន្តិសុខ​សាយប័រ និងការការពារទិន្នន័យ” ដើម្បីលើក​កម្ពស់​កា​រយល់​ដឹង​ពាក់ព័ន្ធ​ការ​ប្រើប្រាស់​ប្រព័ន្ធ​អ៊ិនធើណេត​ប្រកបដោយប្រសិទ្ធិភាព និងការការពារពីហានិភ័យនានា។

នៅក្នុងពិធីបើកសិក្ខាសាលានេះ ឯកឧត្តម ស៊ូ សុជាតិ ប្រតិភូរាជរដ្ឋាភិបាល​ទទួលបន្ទុក​ជា​អគ្គនាយក នៃ​និយ័តករមូលបត្រកម្ពុជា បានមានប្រសាសន៍ថា គោលបំណងសំខាន់​របស់​សិក្ខាសា​លានេះ​ គឺបញ្រ្ជាបការយល់ដឹង​អំពី​សារៈសំខាន់ នៃ​ការ​គ្រប់គ្រង​ទិន្នន័យ​បុគ្គលក្នុ​ង​យុគ​សម័យ​ឌីជីថល ដែលមានដូចជា ការការពារទិន្នន័យ/ព័ត៌មាន បញ្ហាប្រឈម ការបោកបញ្ឆោត បទល្មើសបច្ចេកវិទ្យា ដែលតែងតែកើតឡើងនៅកម្ពុជា និងការគ្រប់គ្រង​សន្តិសុខ​សាយប័រ​ក្នុង​វិស័យ​មូលបត្រ និងវិធានការការពារប្រកបដោយសុវត្ថិភាព ដើម្បីកាត់បន្ថយហានិភ័យ ដែល​កើត​មាន​​ឡើងពីការប្រើប្រាស់បច្ចេកវិទ្យាព័ត៌មាន។

ឯកឧត្តម បានលើកឡើងថា ដោយសារវិស័យបច្ចេកវិទ្យាកំពុងតែរីកចម្រើននៅកម្ពុជា និងដើរតួ​នាទី​យ៉ាង​សំខាន់នៅក្នុងវិស័យសាធារណៈ និងឯកជន អ្នកប្រើប្រាស់ក៏ត្រូវ​ចេះ​ការពារ​សុវត្ថិភាព​ដោយ​ខ្លួន​ឯង តាមរយៈការសិក្សាស្វែងយល់ពីចំណេះដឹងពាក់ព័ន្ធនឹងបច្ចេកវិទ្យា ជាពិសេស​ពាក់ព័ន្ធ​នឹង​សន្តិសុខសាយប័រ ដើម្បីកុំឲ្យធ្លាក់ក្នុងឧបាយកលជនខិលខូចទាំងនោះ។

ឯកឧត្តម កែវ សុទ្ធិ រដ្ឋលេខាធិការក្រសួងប្រៃសណីយ៍ និងទូរគមនាគមន៍ បានមានប្រសាសន៍ថា សន្តិសុខ​សាយប័រ គឺផ្តោតលើការកំណត់ស្តង់ដារខ្ពស់ពាក់ព័ន្ធសន្តិសុខសាយប័រ ចំពោះអង្គ​ភាព​ហេដ្ឋា​រចនា​សម្ព័ន្ធក៏មានសារៈសំខាន់ផងដែរ ក្នុងគោលបំណង​ពង្រឹង​ការ​គ្រប់​គ្រង​ហានិភ័យ​សន្តិសុខ​សាយប័រ ព្រមទាំងបង្ការទប់ស្កាត់ និងដោះស្រាយឧបទ្វេវហេតុសន្តិសុខសាយប័រ ជា​ពិសេស​ក្នុង​វិស័យផ្តល់សេវាសាធារណៈ ដែលមើលឃើញថា មានជនខិលខូចមួយចំនួន បាន​ឆ្លៀតឱកាសវាយប្រហារ ក៏ដូចជាព្យាយាមចូលលួចគណនីតាមប្រព័ន្ធបណ្តាញសង្គមឌីជីថល របស់​ក្រសួង ស្ថាប័ននានា និងរូបវន្តបុគ្គល ដើម្បីយកមក​គ្រប់គ្រង​ក្នុង​គោល​បំណង​ទុច្ចរិ​ត​ផ្សេង​ៗ​ជា​ដើម ដូចជា ការជំរិតទារប្រាក់ ឬការគំរាម​កំហែង​នានា​តាម​រូប​ភាព​ផ្សេង​ៗ​នៅ​លើ​ប្រព័ន្ធ​បច្ចេក​វិទ្យា​ទាំង​នេះ។

គិតមកដល់ពេលនេះ ដើម្បីលើកកម្ពស់ការការពារពីការទទួល​បាន​នូវ​ព័ត៌មាន​មិន​ពិត​ពាក់ព័ន្ធ​នឹង​វិស័យ​មូល​បត្រនៅកម្ពុជា និយ័តករមូលបត្រកម្ពុជាតែងតែធ្វើការផ្សព្វផ្សាយព័ត៌មាន ព្រមទាំង​ព្រឹត្តិការណ៍​នានាដែលពាក់ព័ន្ធនឹងវិស័យមូលបត្រ និងអត្ថបទអប់រំនានា ព្រមទាំង​បទប្បញ្ញត្តិ​ថ្មី​ៗ​តាមរយៈ ហ្វេសប៊ុក ផេក និងតេឡេក្រាម សម្រាប់ធ្វើការផ្សព្វផ្សាយនូវចំណេះដឹង និងក្រើន​រម្លឹក​ដល់​វិនិយោគ ក៏ដូចជាសាធារណជនឲ្យមានការប្រុងប្រយ័ត្នចំពោះការឆបោកនានាផងដែរ៕ អត្ថបទ៖ ឈិត បូរ៉ាវី