ប្រធានាធិបតីបារាំង លោក Emmanuel Macron និងនាយករដ្ឋមន្ត្រីអ៊ីស្រាអែល លោក Benjamin Netanyahu បានសន្ទនាតាមទូរស័ព្ទអំពីស្ថានការណ៍នៅតំបន់មជ្ឈិមបូព៌ា កាលពីថ្ងៃអាទិត្យ បន្ទាប់ពីមានការរិះគន់ចំពោះការអំពាវនាវរបស់មេដឹកនាំបារាំង សម្រាប់ការដាក់បម្រាមអាវុធលើអ៊ីស្រាអែល។

សេចក្តីថ្លែងការណ៍មួយពីវិមានអាលីស្សេ(Elysee) បាននិយាយថា មេដឹកនាំទាំងពីរ បានទទួលស្គាល់នូវទស្សនៈផ្សេងគ្នា ហើយបានបញ្ជាក់ទៅលើបំណងទៅវិញទៅមក សម្រាប់ការយោគយល់កាន់តែប្រសើរ។ លោក Macron បានប្រាប់លោក Netanyahu នូវជំនឿរបស់លោកថា បច្ចុប្បន្ននេះដល់ពេលហើយ សម្រាប់បទឈប់បាញ់។ ការដឹកជញ្ជូនអាវុធ ការអូសបន្លាយពេលនៃសង្រ្គាមនៅតំបន់ហ្កាហ្សា និងការពង្រីកខ្លួនទៅកាន់ប្រទេសលីបង់ ពុំអាចបង្កើតសន្តិសុខដែលត្រូវបានរំពឹងទុកដោយអ៊ីស្រាអែល និងដោយមនុស្សគ្រប់គ្នានៅក្នុងតំបន់បាននោះទេ។

យើងត្រូវតែបង្កើតភ្លាមៗ នូវកិច្ចខិតខំប្រឹងប្រែងយ៉ាងម៉ឺងម៉ាត់ដែលនឹងអនុញ្ញាតឱ្យយើងបង្កើតដំណោះស្រាយនយោបាយដែលចាំបាច់សម្រាប់សន្តិសុខរបស់អ៊ីស្រាអែល និងមនុស្សគ្រប់គ្នានៅតំបន់មជ្ឈិមបូព៌ា។ នៅមុនថ្ងៃខួប១ឆ្នាំនៃការវាយប្រហាររបស់ក្រុមហាម៉ាសលើប្រទេសអ៊ីស្រាអែល លោក Macron បានបញ្ជាក់ជាថ្មីអំពីសាមគ្គីភាពរបស់ប្រជាជនបារាំងជាមួយប្រជាជនអ៊ីស្រាអែល ជាពិសេសជនរងគ្រោះ ចំណាប់ខ្មាំង និងមនុស្សជាទីស្រឡាញ់របស់ពួកគេ។

ទំនាក់ទំនងរវាងបារាំង-អ៊ីស្រាអែល កាន់តែតានតឹង កាលពីចុងសប្តាហ៍កន្លងទៅនេះ បន្ទាប់ពីបទសម្ភាសន៍តាមវិទ្យុរបស់លោក Macron កាលពីល្ងាចថ្ងៃសៅរ៍ ជាកន្លែងដែលលោកបានសង្កត់ធ្ងន់លើតម្រូវការដើម្បីកំណត់អាទិភាពនៃដំណោះស្រាយនយោបាយនិងបានអំពាវនាវឱ្យបញ្ឈប់ការផ្គត់ផ្គង់អាវុធដល់អ៊ីស្រាអែលសម្រាប់ប្រតិបត្តិការរបស់ខ្លួននៅតំបន់ហ្កាហ្សា។ លោក Netanyahu បានថ្កោលទោសយ៉ាងដាច់អហង្កាចំពោះគោលជំហរនេះ ដោយនិយាយថា «ប្រធានាធិបតី លោក Macron និងមេដឹកនាំប្រទេសលោកខាងលិចផ្សេងទៀត ពេលនេះកំពុងគាំទ្រសម្រាប់ការដាក់បម្រាមអាវុធលើអ៊ីស្រាអែល។