ក្រសួងការបរទេសអ៊ីរ៉ង់ បានកោះហៅឯកអគ្គរដ្ឋទូតអូស្ត្រាលី កាលពីថ្ងៃអាទិត្យ ជុំវិញ «ជំហរលំអៀង» របស់រដ្ឋាភិបាលរបស់លោកចំពោះការវិវឌ្ឍន៍ថ្មីៗនៅក្នុងតំបន់។

យោងតាមសេចក្តីថ្លែងការណ៍ដែលចេញផ្សាយដោយក្រសួង បានឲ្យដឹងថា ឯកអគ្គរដ្ឋទូតអូស្ត្រាលីប្រចាំនៅទីក្រុងតេអេរ៉ង់ លោក Ian McConville ត្រូវបានកោះហៅដោយ លោក Ali Asghar Mohammadi អគ្គនាយកប្រចាំតំបន់អាស៊ីបូព៌ា និងអូសេអានី នៅក្រសួងការបរទេសអ៊ីរ៉ង់។

ការកោះហៅនេះ ធ្វើឡើងខណៈនាយករដ្ឋមន្ត្រីអូស្ត្រាលី លោក Anthony Albanese បានថ្កោលទោសការវាយប្រហារដោយមីស៊ីលរបស់អ៊ីរ៉ង់ទៅលើអ៊ីស្រាអែល។ លោក Peter Dutton មេដឹកនាំប្រឆាំងរបស់ប្រទេសអូស្ត្រាលី ក៏បានអំពាវនាវឱ្យមានការបណ្តេញចេញឯកអគ្គរដ្ឋទូតអ៊ីរ៉ង់ប្រចាំនៅប្រទេសអូស្ត្រាលី ផងដែរ។

នៅក្នុងកិច្ចប្រជុំ មន្ត្រីក្រសួងការបរទេសអ៊ីរ៉ង់ បានតវ៉ាចំពោះជំហរ «អយុត្តិធម៌ និងលម្អៀង» របស់រដ្ឋាភិបាលអូស្ត្រាលី ហើយបានថ្កោលទោស «ភាពស្ងៀមស្ងាត់» របស់ប្រទេសនេះនៅចំពោះមុខ «ការឈ្លានពាន» របស់អ៊ីស្រាអែលនៅតំបន់ហ្កាហ្សា និងនៅប្រទេសលីបង់។

លោក Mohammadi បានបញ្ជាក់ជាថ្មី នូវការអំពាវនាវរបស់អ៊ីរ៉ង់ឱ្យបញ្ឈប់ជាបន្ទាន់នូវ «អំពើប្រល័យពូជសាសន៍នៅតំបន់ហ្កាហ្សា និងការឈ្លានពាននៅប្រទេសលីបង់» ដោយអំពាវនាវឱ្យប្រទេសអូស្ត្រាលី និងអ្នកគាំទ្រប្រទេសលោកខាងលិចផ្សេងទៀតរបស់អ៊ីស្រាអែល ដើរតួនាទីទទួលខុសត្រូវដើម្បីបញ្ចប់បញ្ហាទាំងអស់នោះ។

ឯកអគ្គរដ្ឋទូតអូស្ត្រាលី បានបញ្ជាក់លម្អិតអំពីសកម្មភាពរបស់រដ្ឋាភិបាលលោក ក្នុងការទទួលបាន បទឈប់បាញ់នៅតំបន់ហ្កាហ្សា និងលីបង់ ដោយអះអាងថា លោកនឹងនាំយកការតវ៉ាជាផ្លូវការរបស់អ៊ីរ៉ង់ ទៅកាន់រដ្ឋាភិបាលអូស្ត្រាលី។