ក្រុមសម្ព័ន្ធប្រឆាំងការបរិហារកេរ្តិ៍ (ADL) បាននិយាយកាលពីថ្ងៃអាទិត្យ (០៦ តុលា) ថា ចំនួននៃឧប្បត្តិហេតុប្រឆាំងជនជាតិជី្វហ្វ នៅក្នុងសហរដ្ឋអាមេរិក បានកើនឡើងដល់កម្រិតខ្ពស់បំផុតក្នុងកំណត់ត្រាក្នុងរយៈពេលមួយឆ្នាំ បន្ទាប់ពីការវាយប្រហាររបស់ពួកហាម៉ាស លើអ៊ីស្រាអែល ក្នុងឆ្នាំ២០២៣។

ក្រុម ADL ដែលជាអង្គការសិទ្ធិស៊ីវិល បាននិយាយនៅក្នុងសេចក្តីថ្លែងការណ៍មួយថា តួលេខថ្មីដែលគ្របដណ្តប់ពីថ្ងៃទី០៧ ខែតុលា ២០២៣ ដល់ខែកញ្ញា ២០២៤ គឺប្រហែលបីដងនៃចំនួនករណីដែលបានរាយការណ៍ទៅអង្គការក្នុងអំឡុងពេលដូចគ្នាក្នុងឆ្នាំ២០២២។

ក្រុមនេះបានកំណត់ឧប្បត្តិហេតុប្រឆាំងជនជាតិជ្វីហ្វជាង ១០.០០០ករណី ដែលត្រូវបានបែងចែកទៅជាប្រភេទដូចជាការយាយីដោយពាក្យសំដី ឬជាលាយលក្ខណ៍អក្សរ ការបំផ្លាញទ្រព្យសម្បត្តិ និងការវាយដំលើរាងកាយជាដើម។ ចំនួនករណីច្រើនបំផុត ៨.០១៥ករណី ស្ថិតក្នុងប្រភេទការបៀតបៀនដោយពាក្យសំដី ឬជាលាយលក្ខណ៍អក្សរ។

របាយការណ៍ចុងក្រោយបំផុតនេះគឺជាលើកទី៤ ក្នុងរយៈពេល ៦ឆ្នាំដែលក្រុម ADL និយាយថា ខ្លួនទទួលបានតួលេខដ៏ខ្ពស់នៃឧប្បត្តិហេតុប្រឆាំងជនជាតិជ្វីហ្វ។ ឧប្បត្តិហេតុទាំងនោះបានកើនឡើងចាប់តាំងពីក្រុមហាម៉ាស បានវាយប្រហារអ៊ីស្រាអែល ក្នុងឆ្នាំ២០២៣ ហើយសង្រ្គាមបានក្លាយជាបញ្ហាដ៏ក្តៅគគុកនៅតាមមហាវិទ្យាល័យរបស់រដ្ឋអាមេរិក ជាទីដែលការតវ៉ាជាច្រើនបានកើតឡើង៕