លោក Vladimir Putin អាចនាំឲ្យមានការលុកលុយលើប្រទេសអ៊ឺរ៉ុបចំនួន ៣បន្ថែមទៀត ដោយសារការគាំទ្ររបស់រុស្ស៊ី ចំពោះស៊ែប៊ី។ នេះជាការព្រមានរបស់នាយករដ្ឋមន្ត្រីកូសូវ៉ូ លោក Albin Kurti ដែលយល់ថា ស៊ែប៊ីអាចវាយប្រហារលើកូសូវ៉ូ បូស្នី និងម៉ាសេដូនីខាងជើង ដោយសារគោលបំណងវាតទីនិយមរបស់ទីក្រុង Belgrade (បែលក្រាដ) ដែលមានន័យថា សង្គ្រាមថ្មីហាក់កំពុងលេចរូបរាងឡើង។

មេដឹកនាំកូសូវ៉ូរូបនេះ បានធ្វើអត្ថាធិប្បាយបេបនេះ នៅក្នុងបទសម្ភាសន៍ជាមួយសារព័ត៌មាន Associated Press (AP) ខណៈដែលទំនាក់ទំនងរវាងប្រទេសរបស់លោក និងអ្នកជិតខាង នៅក្នុងប្រទេសស៊ែប៊ី នៅតែបន្តមានភាពរអាក់រអួល ហើយលោក Putin ទទួលរងនូវការនិយាយមិនល្អបន្ថែមទៀត។

គួរបញ្ជាក់ថា ប្រទេសកូសូវ៉ូបានទទួលឯករាជ្យនៅឆ្នាំ២០០៨ ប៉ុន្តែជនជាតិស៊ែប៊ីជាច្រើនជឿថា ប្រទេសនេះ ជាកំណើតដើមនៃប្រទេសរបស់ពួកគេ។ ៩២ភាគរយនៃចំនួនប្រជាជនដែលរស់នៅកូសូវ៉ូ គឺជាជនជាតិអាល់បានី ដោយមានតែ ៦ភាគរយប៉ុណ្ណោះជាជនជាតិស៊ែប៊ី។

បន្ទាប់ពីការបែកបាក់សាធារណរដ្ឋសហព័ន្ធសង្គមនិយមយូហ្គោស្លាវី ក្នុងទសវត្សរ៍ឆ្នាំ១៩៩០ ស៊ែប៊ីបានគាបសង្កត់យ៉ាងខ្លាំងក្លាទៅលើជនជាតិអាល់បានី រហូតនាំឲ្យមានយុទ្ធនាការទម្លាក់គ្រាប់បែករបស់អង្គការណាតូ ក្នុងឆ្នាំ១៩៩៩។ កងកម្លាំងស៊ែប៊ី បានដកចេញពីកូសូវ៉ូ ហើយប្រទេសនេះអាចទទួលបានឯករាជ្យ ប៉ុន្តែភាពតានតឹង នៅតែមិនអាចដោះស្រាយបាន។ អង្គការណាតូ បានបង្កើនចំនួនកងកម្លាំងរបស់ខ្លួន នៅតាមព្រំដែនស៊ែប៊ី-កូសូវ៉ូ ក្នុងប៉ុន្មានឆ្នាំថ្មីៗនេះ៕