ប្រធានាធិបតីហ្វីលីពីន លោក Ferdinand Marcos Jr នៅថ្ងៃចន្ទ (ទី៧ ខែតុលា) នេះ បាននិយាយថា ប្រទេសរបស់លោក និងកូរ៉េខាងត្បូង បានលើកកម្ពស់ទំនាក់ទំនងទ្វេភាគីឲ្យទៅជាភាពជាដៃគូយុទ្ធសាស្ត្រ ខណៈដែលលោកបានជួបជាមួយសមភាគី គឺលោក Yoon Suk-yeol ដែលកំពុងធ្វើទស្សនកិច្ច ដើម្បីពិភាក្សាបញ្ហានានា។ 

មេដឹកនាំទាំង២ បានពិភាក្សាគ្នា អំពីបញ្ហាជាច្រើន ក្នុងនោះរួមទាំងបញ្ហាសមុទ្រចិនខាងត្បូង និងស្ថានភាព នៅឧបទ្វីបកូរ៉េ ព្រមទាំងបានចុះហត្ថលេខាលើអនុស្សរណៈយោគយល់គ្នា ស្តីពីកិច្ចសហប្រតិបត្តិការឆ្មាំល្បាតឆ្នេរ និងថាមពលនុយក្លេអ៊ែរ។

ចំណែកលោក Yoon បានលើកឡើងថា ប្រទេសទាំង២ នឹងពង្រឹងភាពជាដៃគូ លើផ្នែកសន្តិសុខ ដោយកូរ៉េខាងត្បូងចូលរួមក្នុងកម្មវិធីទំនើបកម្មនៃយោធាហ្វីលីពីន។

លោក Yoon បាននិយាយថា មេដឹកនាំទាំង២ បានយល់ព្រមបន្តរក្សាសណ្តាប់ធ្នាប់ដែលមានច្បាប់អន្តរជាតិជាមូលដ្ឋាន ក្នុងនោះរួមទាំងសុវត្ថិភាពនៃការធ្វើនាវាចរណ៍ នៅសមុទ្រចិនខាងត្បូងផងដែរ ដោយលោកបានបន្ថែមថា ប្រទេសទាំង២ បានយល់ស្របគ្នាថា សហគមន៍អន្តរជាតិនឹងមិនអត់ឱនចំពោះកម្មវិធីនុយក្លេអ៊ែររបស់កូរ៉េខាងជើង ឬអ្វីដែលលោកហៅថា «ការបង្កហេតុខ្វះវិចារណញ្ញាណ»៕