​ប្រណាំង​រថយន្ត៖ ​ព្រឹត្តិការណ៍ F1 នៅលើ​ទឹកដី​កាតា​នឹង​ចាប់ផ្តើម​វត្តមាន​ក្នុង​កាលវិភាគ​ប្រកួត​ប្រចាំឆ្នាំ​របស់ F1 ចាប់ពី​រដូវ​កាល ២០២៣ តទៅ បន្ទាប់ពី​ប្រទេស​ស្ថិតក្នុង​ដែនដី​អារ៉ាប់​មួយ​នេះ​បានសំរេច​កិច្ចសន្យា​ជាមួយ F1 រយៈពេល ១០ឆ្នាំ​។

​​តែ​ទីលានប្រណាំង Losail នឹងមាន​ការប្រកួត​នៅក្នុង​ឆ្នាំ២០២១ នេះ​ចន្លោះ​ថ្ងៃទី១៩-២១ ខែវិច្ឆិកា​ដែរ​ដើម្បី​បំពេញ​ចន្លោះ​កាលវិភាគ​ដែល​ទំនេរ​ពីថ្ងៃ​ទី១៩ ដល់​ថ្ងៃទី២១ ខែវិច្ឆិកា ដែល​ទីលាន​នេះ​កន្លងមក​ធ្លាប់​រៀបចំ​ការប្រកួត MotoGP​។ ​កាតា​មិនទាន់​បញ្ជាក់​នៅឡើយ​ថា​ ការប្រកួត​នឹង​ធ្វើ​ឡើង​នៅ​លើ​ទីលាន Losail នេះ​រឺ​ជាការ​ប្រណាំង​លើផ្លូវ​សាធារណៈ​ក្នុង​ទីក្រុង​។​ ​កាតា​បាន​សំរេចចិត្ត​ចាប់ផ្តើម​ពី​ឆ្នាំ២០២៣ ទៅដោយ​ឆ្នាំ​ក្រោយនេះ​ផ្តោតលើ​ការរៀបចំ​ឱ្យ​បានល្អ​ព្រឹត្តិការណ៍​បាល់ទាត់​ពិភពលោក FIFA World Cup ២០២២​។​

សូមបញ្ជាក់ថា ​កាតា​នឹង​ជា​ប្រទេស​ក្នុង​តំបន់​អារ៉ាប់​ទី៤ ដែល​រៀបចំ​ព្រឹត្តិការណ៍ F1 ពិភពលោកបន្ទាប់ពី​បា​រ៉ែ​ន អារ៉ាប់​រួម និង​អារ៉ាប៊ីសាអ៊ូឌីត​នឹង​ចាប់ផ្តើម​រដូវ​កាល​ដំបូង​របស់ខ្លួន​ក្នុង​ឆ្នាំ២០២១ នេះ​នៅ​ថ្ងៃទី១០-១២ ខែធ្នូ​។​ ឆ្នាំ២០២១ នេះ​នៅសល់​ការប្រកួត​ចំនួន ៧ទីលាន​ទៀត​ប៉ុណ្ណោះ​ស្របពេល Lewis Hamilton កំពុង​នាំមុខ​លើ​គូប្រជែង Max Verstappen ៥ពិន្ទុ​ប៉ុណ្ណោះ​។ ​៧​ទីលាន​ដែល​នៅសល់​រួមមាន​ទួរគី សហរដ្ឋអាមេរិក ម៉ិ​ក​ស៊ិ​ក ប្រេ​ស៊ី​ល កាតា អារ៉ាប៊ីសាអ៊ូឌីត និង​អារ៉ាប់​រួម​៕

​អត្ថបទ​៖​នាង សុភា​វុ​ធ