នាយករដ្ឋមន្ត្រីថៃ លោកស្រី Paetongtarn Shinawatra (ផែថងថាន ស៊ីណាវ៉ាត់) នៅថ្ងៃចន្ទ (ទី៧ ខែតុលា) នេះ បាននិយាយថា សមាគមប្រជាជាតិអាស៊ីអាគ្នេយ៍ ឬអាស៊ាន (ASEAN) ត្រូវតែដើរតួនាទីសំខាន់ ក្នុងការបញ្ចប់សង្គ្រាមស៊ីវិលដែលអូសបន្លាយ នៅសហភាពមីយ៉ាន់ម៉ា ដោយការលើកឡើងនេះកើតមាននៅមុនមានកិច្ចប្រជុំកំពូលនៃបណ្ដាមេដឹកនាំរបស់ក្រុមសមាជិកទាំង ១០ នៅប្រទេសឡាវ ក្នុងសប្តាហ៍នេះ។

គួរបញ្ជាក់ថា សហភាពមីយ៉ាន់ម៉ា បានស្ថិតនៅក្នុងភាពចលាចល ចាប់តាំងពីខែកុម្ភៈ ឆ្នាំ២០២១ នៅពេលដែលយោធារបស់ប្រទេសនេះ បានទម្លាក់រដ្ឋាភិបាលស៊ីវិលជាប់ឆ្នោត ដោយបង្កឲ្យមានការតវ៉ាដែលប្រែក្លាយទៅអំពើបះបោរប្រដាប់អាវុធប្រឆាំងនឹងរបបយោធាដែលកំពុងកាន់អំណាច។

នៅឯព្រឹត្តិការណ៍មួយ នាទីក្រុងបាងកក ប្រទេសថៃ លោកស្រី Paetongtarn បាននិយាយថា៖ «អាស៊ានត្រូវតែដើរតួនាទីយ៉ាងសំខាន់ ដើម្បីធ្វើឲ្យប្រទេសមីយ៉ាន់ម៉ាមានសន្តិភាពវិញឲ្យបានឆាប់តាមដែលអាចធ្វើទៅបាន»។

លោកស្រី បានបន្ថែមថា ប្រទេសថៃនឹងធ្វើការជាមួយម៉ាឡេស៊ីដែលជាប្រធានអាស៊ាន សម្រាប់ឆ្នាំ២០២៥ ដើម្បីប្រើប្រាស់មធ្យោបាយការទូតដោះស្រាយជម្លោះនេះ ដោយបានគូសបញ្ជាក់ពីអ្វីដែលអាចជាកិច្ចខិតខំប្រឹងប្រែងជាថ្មីរបស់ប្លុកនេះ ដើម្បីជំរុញឲ្យមានដំណោះស្រាយ នៅពេលដែលមេដឹកនាំរបស់ប្រទេសជាសមាជិកជួបជុំគ្នា សម្រាប់កិច្ចប្រជុំកំពូលប្រចាំឆ្នាំ នៅថ្ងៃទី៩ ខែតុលា៕