ក្រុមហេសបូឡាបានបាញ់មីស៊ីលទៅកាន់ទីក្រុងធំទី ៣ ហៃហ្វា (Haifa) របស់អ៊ីស្រាអ៊ែល កាលពីថ្ងៃចន្ទ ទី៧តុលា ខណៈកងកម្លាំងអ៊ីស្រាអែល ទំនងជាត្រៀមពង្រីកការវាយឆ្មក់ថ្មើរជើងទៅក្នុងភាគខាងត្បូងប្រទេសលីបង់ក្នុងខួប១ឆ្នាំដំបូងនៃសង្រ្គាមហ្កាហ្សា ដែលបានធ្វើឲ្យជម្លោះរីករាលដាលនៅទូទាំងមជ្ឈិមបូព៌ា។

ក្រុមហេសបូឡាគាំទ្រដោយអ៊ីរ៉ង់ ជាសម្ព័ន្ធមិត្តរបស់ក្រុមសកម្មប្រយុទ្ធហាម៉ាសប៉ាឡេស្ទីន ដែលកំពុងប្រយុទ្ធជាមួយអ៊ីស្រាអែលនៅដែនដីហ្កាហ្សា បាននិយាយថា ខ្លួនបានដាក់គោលដៅលើមូលដ្ឋានយោធាមួយនៅភាគខាងត្បូងទីក្រុង ហៃហ្វា ដោយមីស៊ីល Fadi 1 ហើយបានបើកការវាយប្រហារមួយទៀតទៅលើតំបន់ តៃប៊ើរៀស (Tiberias) មានចម្ងាយ៦៥គីឡូម៉ែត្រពីទីក្រុងនេះ។

ក្រុមហេសបូឡា បាននិយាយថា ខ្លួនបានដាក់គោលដៅលើតំបន់ភាគខាងជើងនៃទីក្រុងហៃហ្វា ដោយមីស៊ីលនៅពេលក្រោយមក។ យោធាអ៊ីស្រាអែលបាននិយាយថា អាវុធប្រហែល ១៣៥ គ្រាប់បានចូលក្នុងទឹកដីអ៊ីស្រាអែលកាលពីថ្ងៃចន្ទគិតត្រឹមម៉ោង៥ ល្ងាច។ មនុស្ស១០នាក់ត្រូវបានគេរាយការណ៍ថាបានរងរបួសនៅតំបន់ហៃហ្វានិងពីរនាក់ទៀតនៅភាគខាងត្បូងនៅកណ្តាលអ៊ីស្រាអែល។

យោធាអ៊ីស្រាអែលបាននិយាយថា កងកម្លាំងអាកាសកំពុងទម្លាក់គ្រាប់បែកកាន់តែសន្ធាប់ថែមទៀតលើគោលដៅរបស់ក្រុមហេសបូឡានៅភាគខាងត្បូងប្រទេសលីបង់ ហើយទាហានអ៊ីស្រាអែលពីរនាក់ត្រូវបានសម្លាប់ក្នុងការប្រយុទ្ធតាមតំបន់ព្រំដែន ដែលនាំឱ្យចំនួនយោធាស្លាប់ នៅប្រទេសលីបង់រហូតមកដល់ពេលនេះកើនឡើងដល់ ១១ នាក់។

ក្រសួងសុខាភិបាលប្រទេសលីបង់បាននិយាយថា ក្រុមអ្នកពន្លត់អគ្គិភ័យចំនួន ១០ នាក់ត្រូវបានសម្លាប់នៅក្នុងការវាយប្រហារតាមអាកាសរបស់អ៊ីស្រាអែលទៅលើអគារក្រុងក្នុងទីក្រុងព្រំដែន      ប៊ីន ជេបេល (Bint Jbeil) ហើយការវាយប្រហារតាមអាកាសផ្សេងទៀតកាលពីថ្ងៃអាទិត្យបានសម្លាប់មនុស្ស ២២ នាក់នៅក្នុងទីប្រជុំជនភាគខាងត្បូង និងភាគខាងកើតប្រទេសលីបង់៕