សាធារណរដ្ឋប្រជាធិបតេយ្យកុងហ្គោ បានពង្រីកយុទ្ធនាការចាក់វ៉ាក់សាំងជំងឺអុតស្វា(mpox) របស់ខ្លួន កាលពីថ្ងៃចន្ទ ដោយបុគ្គលិកសុខាភិបាលនៅក្នុងខេត្ត North Kivu និងខេត្ត South Kivu បានទទួលកាចាក់វ៉ាក់សាំងរួចហើយ ទោះបីជាមានមនុស្សដែលមានហានិភ័យជាច្រើនទៀត នៅតែពុំទាន់បានចាក់វ៉ាក់សាំងក៏ដោយ ខណៈប្រទេសនេះកំពុងប្រយុទ្ធដើម្បីទប់ស្កាត់ការរីករាលដាលជំងឺនេះ។

ការចាក់វ៉ាក់សាំង បានធ្វើឡើងបន្ទាប់ពីការចាប់ផ្តើមតាមការកំណត់កាលពីថ្ងៃសៅរ៍ ហើយមន្ត្រីសុខាភិបាល បាននិយាយថា មជ្ឈមណ្ឌលចាក់វ៉ាក់សាំងត្រូវបានបង្កើតឡើងនៅខាងក្រៅទីក្រុង Goma ក្នុងខេត្ត North Kivu និងនៅជិតក្រុង Bukavu ក្នុងខេត្ត South Kivu ។

យោងតាមអង្គការសុខភាពពិភពលោក (WHO) បានឲ្យដឹងថា ប្រទេសកុងហ្គោ បានរាយការណ៍ពីករណីសង្ស័យជាង៣០.០០០ករណី និងបានបញ្ជាក់អំពីជំងឺអុតស្វា(mpox) ចាប់តាំងពីខែមករា ដែលមានចំនួន៩០% នៃករណីនៅទ្វីបអាហ្រ្វិកក្នុងឆ្នាំនេះ ។

ដោយវ៉ាក់សាំងចំនួន ២៦៥.០០០ដូសបានទទួលរួចហើយ ហើយចំនួនច្រើនដូសទៀតត្រូវបានរំពឹងទុក ខណៈអាជ្ញាធរសុខាភិបាល មានបំណងទប់ស្កាត់ការរីករាលដាលវីរុសនេះ ដែលអង្គការសុខភាពពិភពលោកបានប្រកាសថាជាគ្រាអាសន្នសុខភាពសាធារណៈនៃការព្រួយបារម្ភអន្តរជាតិ កាលពីខែសីហា។

ទោះជាយ៉ាងណា ក្រុមមន្ត្រីទទួលស្គាល់ថា ការផ្គត់ផ្គង់បច្ចុប្បន្ននៅមិនទាន់គ្រប់គ្រាន់សម្រាប់តម្រូវការរបស់ប្រទេសនេះទេ។