យោធាប្រទេសអ៊ីស្រាអែល បាននិយាយនៅក្នុងសេចក្តីថ្លែងការណ៍ថា ក្រុមសកម្មប្រយុទ្ធនៅក្នុងប្រទេសយេម៉ែន បានបាញ់មីស៊ីលពីដីទៅដី ចូលទៅប្រទេសអ៊ីស្រាអែលភាគកណ្តាល កាលពីរសៀលថ្ងៃចន្ទ ដែលមីស៊ីលត្រូវបានស្ទាក់ចាប់ដោយប្រព័ន្ធការពារដែនអាកាសរបស់ប្រទេស។

យោធាបាននិយាយថា មីស៊ីលពីដីទៅដី ដែលបានបាញ់ចេញពីប្រទេសយេម៉ែន ត្រូវបានស្ទាក់ចាប់ ជោគជ័យ ដោយកងកម្លាំងទ័ពអាកាសរបស់ប្រទេសអ៊ីស្រាអែល។

ការបាញ់មីស៊ីលនេះ បានចាប់ផ្តើមឲ្យមានស៊ីរ៉ែនព្រមានពីការវាយប្រហារតាមអាកាសនៅក្នុងទីក្រុង និងទីប្រជុំជនចំនួន២០០នៅទូទាំងភាគកណ្តាលប្រទេសអ៊ីស្រាអែល រួមមានទាំងនៅទីក្រុងTel Aviv នៅតំបន់អាកាសយានដ្ឋានអន្តរជាតិBen Gurion ទីក្រុងBeit Shemesh ជាទីក្រុងមួយនៅភាគខាងលិចទីក្រុងហ្សេរុយសាឡឹម និងទីតាំងលំនៅជាច្រើនកន្លែងទៀតនៅក្នុងតំបន់កាន់កាប់ West Bank។

យោងតាមលោក Eli Bin នាយកអង្គភាពសេវាសង្គ្រោះបន្ទាន់របស់អ៊ីស្រាអែល បាននិយាយថា ពុំមានអ្នកស្លាប់និងរងរបួស ត្រូវបានរាយការណ៍នោះទេ។