រដ្ឋមន្ត្រីទទួលបន្ទុកកិច្ចការសហភាពអឺរ៉ុប លោក Janos Boka បានប្រកាសនៅក្នុងសារបង្ហោះលើ បណ្តាញសង្គមFacebook កាលពីថ្ងៃច័ន្ទថា ប្រទេសហុងគ្រី បានស្នើសុំការលើកលែងជាផ្លូវការ ពីការសុំសិទ្ធិជ្រកកោន និងបទប្បញ្ញត្តិអន្តោប្រវេសន៍របស់សហភាពអឺរ៉ុប(EU)។

សំណើនេះ ត្រូវបានធ្វើឡើងតាមរយៈលិខិតមួយច្បាប់ផ្ញើទៅកាន់ស្នងការអឺរ៉ុបទទួលបន្ទុកកិច្ចការផ្ទៃក្នុង លោកស្រី Ylva Johansson។

នៅក្នុងលិខិតនោះ លោក Boka បានបញ្ជាក់ថា ប្រទេសហុងគ្រី ព្យាយាមស្ដារការគ្រប់គ្រងប្រទេសកាន់តែខ្លាំង លើគោលនយោបាយអន្តោប្រវេសន៍របស់ខ្លួន ដោយលើកឡើងពីកង្វល់សន្តិសុខជាតិ និងតម្រូវការក្នុងការទប់ស្កាត់ការធ្វើអន្តោប្រវេសន៍ខុសច្បាប់ ជាហេតុផលចម្បងសម្រាប់សុំការលើកលែងនេះ។

លោក Boka បាននិយាយថា ប្រទេសហុងគ្រី នឹងចាប់ផ្តើមនីតិវិធីចាំបាច់រហូតដល់ទីបញ្ចប់ ដោយបាននិយាយថា ខ្លួនធ្វើតាមគំរូរបស់ប្រទេសហូឡង់។ រដ្ឋាភិបាលហូឡង់ ដែលដឹកនាំដោយគណបក្ស PVV បានប្រកាសកាលពីថ្ងៃទី១៨ ខែកញ្ញាថា ខ្លួនបានស្វែងរកការដកខ្លួនចេញពីវិធានការអន្តោប្រវេសន៍របស់សហភាពអឺរ៉ុប រហូតដល់មានការចរចាឡើងវិញនៃសន្ធិសញ្ញា។

រដ្ឋមន្ត្រីហុងគ្រី បាននិយាយថា រដ្ឋាភិបាលប្តេជ្ញាចាត់វិធានការយ៉ាងម៉ឺងម៉ាត់ដើម្បីការពារព្រំដែនរបស់ខ្លួន និងទប់ស្កាត់ការធ្វើអន្តោប្រវេសន៍ខុសច្បាប់ ដែលគំរាមកំហែងដល់សន្តិសុខជាតិ។