​បាល់ទាត់៖ ប្រព័ន្ធ​ផ្សព្វផ្សាយ​ប្រេ​ស៊ី​ល​បាន​រាយការណ៍​ថា​ ខ្សែប្រយុទ្ធ​អេ​ស្ប៉ា​ញ​ និង​ក្រុម Atletico Mineiro កីឡាករ Diego Costa គឺជា​គោលដៅ​មួយ​នៅ​ក្នុង​ប្រតិបត្តិការ​របស់​ប៉ូលិស​ដើម្បី​ “ស្វែងរក​ភស្តុតាង​នៃ​ការ​ចោទ​ប្រកាន់​ថា​ បាន​ធ្វើ​អាជីវកម្ម​លាង​លុយ​កខ្វក់ ការ​លួច​បន្លំ​ប្រាក់​បរទេស និង​ការ​រៀបចំ​ឧក្រិដ្ឋកម្ម​” តាមរយៈ​គេហទំព័រ​ភ្នាល់​។​

​ប៉ូលិស​ប្រេ​ស៊ី​ល​កំពុង​ដំណើរការ​ប្រតិបត្តិ​ការ​ដំណាក់កាល​ទី​២ នៅ​ថ្ងៃ​ព្រហស្បតិ៍​ម្សិលមិញ ហើយ​បាន​ចេញ​សេចក្ដីថ្លែងការណ៍​មួយ​ដោយ​និយាយ​ថា ​ពួកគេ​កំណត់​អត្តសញ្ញាណ​ទំរង់​ភ្នាល់​ដែល​ប្រើ​ដោយ​ក្រុមហ៊ុន​នីមួយៗ​ ក៏ដូចជា​នីតិបុគ្គល​ដែល​ត្រូវ​បាន​ប្រើ​សម្រាប់​ការ​លាង​លុយ​កខ្វក់ និង​ការ​លួច​បន្លំ​ប្តូរ​ប្រាក់​បរទេស​ដោយ​បន្ថែម​ថា​ “កីឡាករ​បាល់ទាត់​ម្នាក់​ត្រូវ​បាន​សន្មត​ថា ​ជា​អ្នក​ផ្តល់​ហិរញ្ញប្បទាន​នៃ​គ្រោងការណ៍​ឧក្រិដ្ឋកម្ម​”។​ ​គេហទំព័រ​ក្នុងស្រុក Ge.com បាន​កំណត់​អត្តសញ្ញាណ Diego Costa ថា​ជា​កីឡាករ​ដែល​ពាក់ព័ន្ធ​។​

​ដីកាចាប់ខ្លួន​របស់​ប៉ូលិស​ត្រូវ​បាន​ចេញ​សម្រាប់​ទីក្រុង​មួយ​ចំនួន​រួម​ទាំង​ទីក្រុង Lagarto នៅ​រដ្ឋ Sergipe ដែលជា​ស្រុកកំណើត​របស់ Costa ប៉ុន្តែ​មិនមែន​ទៅ Belo Horizonte ដែល​គាត់​រស់​នៅ​ឥឡូវនេះ​ទេ​។​ ទាំង Diego Costa និង​ក្លឹប​របស់​គេ​គឺ​ក្រុម Atletico Mineiro មិនបាន​ចេញ​សេចក្ដីថ្លែងការណ៍​ណាមួយ​ឡើយ​ដើម្បី​ឆ្លើយតប​នឹង​រឿង​នេះ​៕

​អត្ថបទ​៖​នាង សុភា​វុ​ធ