លោក Gennady Gatilov តំណាងអចិន្ត្រៃយ៍របស់រុស្ស៊ីប្រចាំការិយាល័យអង្គការសហប្រជាជាតិ និងអង្គការអន្តរជាតិផ្សេងទៀត នៅទីក្រុងហ្សឺណែវ បាននិយាយថា ការកើនឡើងនៃអំពើហិង្សានៅមជ្ឈិមបូព៌ាអាចប៉ះពាល់ដល់ពិភពលោកទាំងមូល ខណៈដែលការបង្កើតលក្ខខណ្ឌសម្រាប់ការដោះស្រាយជម្លោះតាមរយៈមធ្យោបាយនយោបាយ និងការទូត ទាមទារឲ្យបញ្ចប់ប្រតិបត្តិការយោធា។

នៅក្នុងសេចក្តីថ្លែងការណ៍មួយដែលត្រូវបានបង្ហោះនៅលើបណ្តាញ Telegram របស់បេសកកម្មរុស្ស៊ី លោកបានចង្អុលបង្ហាញថា «ការកើនឡើងនៃអំពើហិង្សាដែលមិនរើសមុខ បង្កឲ្យមានផលវិបាកដែលមិនអាចទាយទុកជាមុនបាន និងមិនអាចជួសជុលបាន មិនត្រឹមតែសម្រាប់ក្នុងតំបន់ប៉ុណ្ណោះទេ ប៉ុន្តែសម្រាប់ពិភពលោកទាំងមូល»។

លោក Gatilov បានកត់សម្គាល់ថា៖«យើងអំពាវនាវឲ្យបញ្ឈប់ជាបន្ទាន់នូវអរិភាពនានា។ នេះគឺជាផ្លូវតែមួយគត់ក្នុងការបង្កើតលក្ខខណ្ឌសម្រាប់ដំណោះស្រាយនយោបាយ និងការទូត ការដោះលែងចំណាប់ថ្នូរ និងការធានាឲ្យមានលទ្ធភាពមនុស្សធម៌ប្រកបដោយប្រសិទ្ធភាពទៅដល់អ្នកដែលត្រូវការទាំងអស់នោះ»។

បេសកជនរុស្ស៊ីរូបនេះ បានសង្កត់ធ្ងន់ថា៖«នៅថ្ងៃទី៧ ខែតុលា ឆ្នាំ ២០២៣ ពិភពលោក ត្រូវបានរង្គោះរង្គើដោយសោកនាដកម្មដ៏គួរឲ្យរន្ធត់នៅក្នុងប្រទេសអ៊ីស្រាអែល ដែលបានឆក់យកជីវិតមនុស្សជិត ១.២០០ នាក់ និងបានបំផ្លាញជោគវាសនារបស់មនុស្សរាប់ពាន់នាក់»។