ឯកអគ្គរដ្ឋទូតអ៊ីរ៉ង់ប្រចាំនៅទីក្រុងមូស្គូ លោក Kazem Jalali បានប្រាប់សារព័ត៌មាន TASS ថា ទីក្រុងតេអេរ៉ង់ នឹងមិនអនុញ្ញាតឲ្យអ៊ីស្រាអែលបង្កវិបត្តិជុំថ្មី នៅមជ្ឈិមបូព៌ាឡើយ។

អ្នកការទូតរូបនេះ បាននិយាយថា៖«សាធារណរដ្ឋឥស្លាមអ៊ីរ៉ង់ នឹងមិនអនុញ្ញាតឲ្យអ៊ីស្រាអែលបង្ក អំពើហិង្សានិងវិបត្តិជុំវិញថ្មី នៅក្នុងតំបន់នេះទេ»។

លោកបានបន្តថា៖ «របបអ៊ីស្រាអែល រស់នៅក្នុងពិភពនៃភាពច្របូកច្របល់។ លោកបានបន្ថែមថា៖«របបនេះ បំពានលើបទប្បញ្ញត្តិមនុស្សធម៌ និងអន្តរជាតិទាំងអស់។ អ៊ីស្រាអែល ចាំបាច់ណាស់ត្រូវបញ្ចប់អាកប្បកិរិយាបែបនេះ»។

យោងតាមលោកឯកអគ្គរដ្ឋទូត អាកប្បកិរិយារបស់ប្រទេសលោកខាងលិចគឺ «មានការភ្ញាក់ផ្អើល» នៅក្នុង បរិបទនេះ។

លោកបានពន្យល់ថា៖«ប្រទេសទាំងនេះ នៅស្ងៀមចំពោះអំពើប្រល័យពូជសាសន៍ នៅតំបន់ហ្កាហ្សាស្ទ្រីប មិនបង្ហាញប្រតិកម្មចំពោះការវាយប្រហារ និងការសម្លាប់នៅក្នុងប្រទេសលីបង់ និងស៊ីរី មិនអើពើនឹងការវាយប្រហារលើមជ្ឈមណ្ឌលការទូត និងការធ្វើឃាតដែលធ្វើឡើងដោយរបបអ៊ីស្រាអែល ប៉ុន្តែបានថ្កោលទោសជាឯកច្ឆន្ទលើការការពារស្របច្បាប់របស់អ៊ីរ៉ង់»។ លោក Jalali បានសង្កត់ធ្ងន់ថា៖ «ប្រទេសក្នុងតំបន់ មានការព្រួយបារម្ភអំពីស្ថានភាពនេះ»។