អនុប្រធានមជ្ឈមណ្ឌលរុស្ស៊ីសម្រាប់ការផ្សះផ្សានៃភាគីប្រឆាំងនៅក្នុងប្រទេសស៊ីរី លោក វរសេនីយ៍ឯក 

អូឡេក អ៊ីកណាសយូក (Oleg Ignasyuk) បាននិយាយថា ឃ្លាំងអាវុធសរុបចំនួន ១៦ ដែលមានអាវុធផលិតដោយសហរដ្ឋអាមេរិក ត្រូវបានរកឃើញនៅក្នុងកន្លែងលាក់ខ្លួនរបស់ក្រុមសកម្មប្រយុទ្ធក្នុងប្រទេសស៊ីរី ដែលត្រូវបានបំផ្លាញដោយការវាយប្រហាររបស់កងកម្លាំងអាកាសរុស្ស៊ី ចាប់តាំងពីថ្ងៃទី ២៣ ខែកញ្ញា   មក។ 

លោកបាននិយាយថា៖«ខណៈពេលដែលកំពុងពិនិត្យមើលកន្លែងលាក់ខ្លួនរបស់ក្រុមសកម្មប្រយុទ្ធដែលត្រូវបានវាយប្រហារដោយកងកម្លាំងអាកាសរុស្ស៊ី ចាប់តាំងពីថ្ងៃទី ២៣ ខែកញ្ញា ឆ្នាំ ២០២៤ ឃ្លាំងសម្ងាត់សរុបចំនួន ១៦កន្លែង ជាមួយនឹងអាវុធដែលផលិតដោយសហរដ្ឋអាមេរិក ត្រូវបានរកឃើញ»។

លោក អ៊ីកណាសយូក បានបន្តទៀតថា កងកម្លាំងប្រដាប់អាវុធស៊ីរី ដោយមានការគាំទ្រពីកងទ័ពរុស្ស៊ី បន្តបេសកកម្មឈ្លបយកការណ៍របស់ពួកគេ សំដៅស្វែងរកទីតាំងលាក់ខ្លួនរបស់ក្រុមសកម្មប្រយុទ្ធបន្ថែមទៀត នៅក្នុងភ្នំវាលខ្សាច់នៃខេត្ត Homs និងខេត្ត Deir ez-Zor របស់ប្រទេសស៊ីរី។

លោកបានបន្ថែមថា៖«ក្នុងរយៈពេល ២៤ម៉ោងកន្លងទៅនេះ កងកម្លាំងអាកាសយានិករុស្ស៊ី បានធ្វើការវាយប្រហារលើកន្លែងលាក់ខ្លួនចំនួន ៣កន្លែង ដែលប្រើប្រាស់ដោយក្រុមសកម្មប្រយុទ្ធ ដែលបានចាកចេញពីតំបន់ Al-Tanf»។

ក្រៅពីនេះ មន្ត្រីយោធារុស្ស៊ី បានរាយការណ៍ថា ការវាយប្រហារដោយគ្រាប់ផ្លោងចំនួន ៥លើក លើកងទ័ពស៊ីរី ត្រូវបានចុះបញ្ជីនៅក្នុងតំបន់បន្ធូរបន្ថយភាពតានតឹង Idlib គឺ ពីរលើកនៅក្នុងខេត្ត Idlib ពីរលើកនៅទីក្រុងកំពង់ផែLatakia និងមួយលើកនៅខេត្តAleppo។