អ្នករស់នៅក្នុងទីក្រុងបេរូត ដែលកំពុងដើរតាមផ្លូវនៅតាមបណ្តោយឆ្នេរក្នុងទីក្រុង នៅថ្ងៃអង្គារ នេះបាននិយាយថា ពួកគេមានក្តីសង្ឃឹមសម្រាប់សន្តិភាព ទោះបីជាមានភាពមិនច្បាស់លាស់ក៏ដោយ ខណៈ អ៊ីស្រាអែលនៅតែបន្តវាយប្រហារនៅផ្នែកផ្សេងៗក្នុងប្រទេសលីបង់។

លោក Omar ពលរដ្ឋរស់នៅក្នុងទីក្រុង និយាយថា អ្នកដឹងទេ វាបានកើតឡើងកាលពីពេលមុនក្នុងសង្គ្រាមឆ្នាំ ១៩៨២ និងមានសង្រ្គាមស៊ីវិល ហើយបន្ទាប់មកអ្វីៗគ្រប់យ៉ាងបានប្រសើរឡើង ដូច្នេះខ្ញុំគិតថា វានឹងមានភាពល្អប្រសើរឡើងវិញ។ 

ការវាយប្រហារតាមអាកាសរបស់អ៊ីស្រាអែល បានជម្លៀសប្រជាជន១,២លាននាក់នៅក្នុងប្រទេសលីបង់ ហើយយុទ្ធនាការទម្លាក់គ្រាប់បែកកាន់តែខ្លាំងឡើងរបស់អ៊ីស្រាអែល បានធ្វើឱ្យប្រជាជនលីបង់ជាច្រើនព្រួយបារម្ភថាប្រទេសរបស់ពួកគេនឹងជួបប្រទះការបំផ្លិចបំផ្លាញដ៏ធំ ដូចដែលបានកើតឡើងនៅតំបន់ហ្កាហ្សា បង្កឡើងដោយអ៊ីស្រាអែល។

ក្រសួងសុខាភិបាល ប្រទេសលីបង់បានរាយការណ៍ថាមានអ្នកស្លាប់រាប់សិបនាក់ រួមទាំងអ្នកពន្លត់អគ្គិភ័យចំនួន១០នាក់បានស្លាប់នៅក្នុងការវាយប្រហារតាមអាកាសលើអគារនៅទីក្រុងក្នុងតំបន់ព្រំដែន។ ប្រជាជនលីបង់ប្រហែល ២.០០០នាក់ត្រូវបានសម្លាប់ចាប់តាំងពីក្រុមហេសបូឡា ចាប់ផ្តើមការបាញ់ផ្លោងទៅលើអ៊ីស្រាអែលកាលពីមួយឆ្នាំមុនក្នុងសាមគ្គីភាពជាមួយក្រុមហាម៉ាស ដែលភាគច្រើនត្រូវបានសម្លាប់ក្នុងរយៈពេលប៉ុន្មានសប្តាហ៍កន្លងទៅនេះ។