កាលពីថ្ងៃទី៤ ខែតុលា សហភាពអឺរ៉ុប (EU) បានបោះឆ្នោតគាំទ្រការដំឡើងពន្ធលើរថយន្តអគ្គិសនី (EV) ពីប្រទេសចិន។ ប៉ុន្តែទោះបីជាការបោះឆ្នោតត្រូវបានអនុម័តក៏ដោយ ក៏ចំនួននៃសំឡេងអនុបវាទខ្ពស់ ឆ្លុះបញ្ចាំងពីការខ្លាចរអែងដែលមានជាយូរមកហើយ អំពីថា តើអឺរ៉ុបគួរតែប្រឈមជាមួយប្រទេសចិនយ៉ាងដូចម្ដេច។

ក្នុងខណៈពេលដែលប្រទេសចំនួន ១០ តំណាងឲ្យចំនួនប្រជាជនសហភាពអឺរ៉ុប ៤៥,៩៩ភាគរយ (រួមទាំងប្រទេសបារាំង អ៊ីតាលី និងប៉ូឡូញ) បានគាំទ្រវិធានការនេះ ១២ប្រទេស ដែលមានចំនួនប្រជាជន ៣១,៣៦ភាគរយ បានផ្ដល់សំឡេងអនុបវាទ ហើយប្រទេសចំនួន៥ ដឹកនាំដោយអាល្លឺម៉ង់ដែលមានប្រជាជន ២២,៦៥ភាគរយ បានប្រឆាំងនឹងការដំឡើងពន្ធនេះ។ ប្រសិនបើចង់ឲ្យវិធានការនេះអាចត្រូវបានរារាំង តម្រូវឲ្យមានប្រទេសយ៉ាងហោចណាស់ចំនួន ១៥ ដែលតំណាងឲ្យចំនួនប្រជាជនសហភាពអឺរ៉ុប ៦៥ភាគរយ បោះឆ្នោតបដិសេធ ពោលគឺយ៉ាងហោចណាស់ប្រទេសមួយចំនួនដែលផ្ដល់សំឡេងអនុបវាទ នឹងទំនងជាបានផ្លាស់ប្តូរការបោះឆ្នោតរបស់ពួកគេទៅជាសំឡេងឆ្នោត «បដិសេធ» ទាំងស្រុង។

កាតព្វកិច្ចពន្ធនេះនឹងចូលជាធរមាន នៅថ្ងៃទី៣១ ខែតុលា ហើយនិងមានរយៈពេលយ៉ាងតិច ៥ឆ្នាំ។ ការការស្នើដំឡើងពន្ធ ដែលអាចឈានដល់កម្រិតខ្ពស់រហូតដល់ ៣៥,៥ភាគរយ គឺមានបំណងដោះស្រាយការព្រួយបារម្ភលើអ្វី ដែល EU មើលឃើញថា ជាការឧបត្ថម្ភធនរបស់រដ្ឋដែលធ្វើឲ្យខូចទីផ្សាររបស់ចិនដល់ក្រុមហ៊ុន EV ក្នុងស្រុក។ ទីក្រុងប៉េកាំងបានបដិសេធឥតឈប់ឈរនូវវត្តមាននៃការឧបត្ថម្ភធនរបស់រដ្ឋ ដោយបានហៅការរកឃើញនៃការស៊ើបអង្កេតរបស់ EU ថា «ត្រូវបានបង្កើតឡើងដោយសិប្បនិម្មិត និងជាការបំផ្លើស»។

តាមទស្សនៈរបស់ទីក្រុងប៉េកាំង ការស៊ើបអង្កេតរបស់ EU លើការឧបត្ថម្ភធនរថយន្ត EV របស់ចិន គឺជាករណីការគាំពារនិយមយ៉ាងច្បាស់ក្រឡែតដែលមិនគោរពច្បាប់របស់អង្គការពាណិជ្ជកម្មពិភពលោក (WTO)។ មន្ត្រីចិនបានរិះគន់សកម្មភាពរបស់ EU ថា ជាអាកប្បកិរិយាគាំពារនិយមមិនអៀនខ្មាស ហើយបានប្តេជ្ញាការពារផលប្រយោជន៍របស់សហគ្រាសចិន៕