ក្នុងអំឡុងពេលបេសកកម្មបន្ទាន់លើកដំបូងរបស់រដ្ឋមន្ត្រីការបរទេសអាមេរិក លោក Antony Blinken ទៅកាន់តំបន់មជ្ឈិមបូព៌ា បន្ទាប់ពីមាននូវការវាយប្រហារភេរវកម្មថ្ងៃទី៧ ខែតុលា ឆ្នាំ២០២៣ របស់ក្រុមហាម៉ាស លោកបានលេចមុខក្នុងកិច្ចប្រជុំដ៏យូរ នៅក្នុងមជ្ឈមណ្ឌលបញ្ជាការអ៊ីស្រាអែលដែលបន្តរហូតដល់ព្រឹកព្រលឹម ដើម្បីប្រកាសថា ប្រធានាធិបតី លោក Joe Biden នឹងធ្វើទស្សនកិច្ចនៅប្រទេសនេះ ក្នុងពេលឆាប់ៗ «ដើម្បីបញ្ជាក់ឡើងវិញនូវសាមគ្គីភាពរបស់សហរដ្ឋអាមេរិកជាមួយនឹងអ៊ីស្រាអែល»។

ប៉ុន្តែការប្រកាសប្រាប់ពីដំណើររបស់លោកប្រធានាធិបតីនេះ គឺច្រើនជាងការបង្ហាញការគាំទ្រដោយត្រង់ៗ។ វាគឺជារង្វាន់មួយដែលត្រូវបានព្យួរនៅចំពោះមុខនាយករដ្ឋមន្ត្រីអ៊ីស្រាអែល លោក Benjamin Netanyahu ក្នុងអំឡុងពេលការចរចារយៈពេល ៩ម៉ោង មុនមានការប្រកាសនោះ ខណៈដែលមន្ត្រីអាមេរិកបានប្រាប់អ៊ីស្រាអែលឲ្យបញ្ចប់ការបិទផ្លូវទាំងស្រុងរបស់ខ្លួន នៅតំបន់ហ្កាហ្សាស្ទ្រីប ដើម្បីឲ្យជំនួយមនុស្សធម៌ដែលកំពុងត្រូវការយ៉ាងខ្លាំង អាចចូលទៅបាន។

តែយ៉ាងណាក្ដី ត្រឹមតែរយៈពេល ១០ថ្ងៃ នៅក្នុងសង្រ្គាមអ៊ីស្រាអែល និងក្រុមហាម៉ាស រដ្ឋបាលរបស់លោក Biden បានប្រឈមនឹងការពិតដ៏លំបាកផ្នែកការទូតរួចទៅហើយ ពោលគឺដូចជាពិបាកក្នុងការចរចាជាមួយសត្រូវរបស់ពួកគេ ហើយជារឿយៗវាកាន់តែលំបាកក្នុងការដោះស្រាយជាមួយបណ្ដាសម្ព័ន្ធមិត្ត។

ជារួម បន្ទាប់ពីការប្រយុទ្ធគ្នាពេញ ១ឆ្នាំ កិច្ចខិតខំប្រឹងប្រែង ដើម្បីស្តារសន្តិភាពឡើងវិញ បានបង្ហាញពីភាពឥតទទួលបានផ្លែផ្កាអ្វីនោះឡើយ មកទល់ពេលនេះ ហើយការកាត់បន្ថយផលប៉ះពាល់ដ៏អាក្រក់បំផុតនៃជម្លោះ នៅតែបន្តមានការលំបាករៀងរាល់ថ្ងៃ។ ហើយនៅពេលដែលវិបត្តិដែលកំពុងបន្តឡើងកម្ដៅឥតថមថយ បណ្ដាអ្នកជំនាញ និងមន្ត្រី ថ្លឹងថ្លែងអំពីថា តើសហរដ្ឋអាមេរិកជះឥទ្ធិពលលើសង្រ្គាមអ៊ីស្រាអែល និងក្រុមហាម៉ាស ក្នុងរយៈពេល ១២ខែកន្លងមកនេះយ៉ាងដូចម្ដេច និងអំពីថា តើអ្វីដែលអាចនឹងកើតមានឡើងបន្ទាប់ទៀត៕