អ្នកនាំពាក្យរបស់ការិយាល័យរបស់នាយកស៊ើបការណ៍សម្ងាត់ជាតិអាមេរិក បាននិយាយនៅក្នុងសន្និសីទសារព័ត៌មានមួយសម្រាប់អ្នកកាសែតបរទេសថា រហូតមកទល់ពេលនេះ ទីភ្នាក់ងារស៊ើបការណ៍សម្ងាត់របស់សហរដ្ឋអាមេរិក មិនទាន់ឃើញការប៉ុនប៉ងណាមួយដោយតួអង្គបរទេស ដើម្បីជ្រៀតជ្រែកចូលក្នុងការបោះឆ្នោតប្រធានាធិបតីនៅថ្ងៃទី ៥ ខែវិច្ឆិកា នៅសហរដ្ឋអាមេរិកនោះទេ។  

អ្នកនាំពាក្យរូបនេះ បាននិយាយថា៖«ចំពោះសុវត្ថិភាពនៃប្រព័ន្ធ និងនីតិវិធីនៃការបោះឆ្នោត អ្វីដែលខ្ញុំចង់និយាយ គឺយើងមិនទាន់ឃើញមានការប្រឹងប្រែងពីបរទេស ក្នុងការវាយប្រហារលើសុចរិតភាពនៃប្រព័ន្ធបោះឆ្នោតនៅឡើយទេ ហើយសកម្មភាពជាច្រើនដែលយើងកំពុងឃើញកន្លងមក គឺប្រតិបត្តិការឥទ្ធិពល ឬប្រតិបត្តិការព័ត៌មានតែប៉ុណ្ណោះ»។

សេចក្តីថ្លែងការណ៍ស្រដៀងគ្នានេះ ត្រូវបានធ្វើឡើងដោយអ្នកនាំពាក្យការិយាល័យនាយកស៊ើបការណ៍សម្ងាត់ជាតិអាមេរិក កាលពីដើមខែកញ្ញា។

ការបោះឆ្នោតប្រធានាធិបតីសហរដ្ឋអាមេរិក នឹងធ្វើឡើង នៅថ្ងៃទី ៥ ខែវិច្ឆិកា។ ប្រធានាធិបតីអាមេរិកដែលកំពុងកាន់អំណាច លោក ចូ បៃដិន (Joe Biden) ត្រូវបានគេរំពឹងថា នឹងឈរឈ្មោះជាបេក្ខភាព របស់គណបក្សប្រជាធិបតេយ្យ ប៉ុន្តែបន្ទាប់ពីការធ្វើមិនបានល្អរបស់គាត់ នៅពេលជជែកដេញដោលកាលពីខែមិថុនាជាមួយអតីតប្រធានាធិបតីអាមេរិក លោក ត្រាំ (Trump) គាត់បានសម្រេចចិត្តលាឈប់ពីការប្រកួតប្រជែងតំណែងនេះ ហើយជំនួសមកបានគាំទ្រការតែងតាំងអនុប្រធានាធិបតីរបស់គាត់ គឺលោក ស្រី Kamala Harris។ បេក្ខភាពរបស់លោកស្រី ត្រូវបានអនុម័តជាផ្លូវការ នៅក្នុងសន្និបាតជាតិប្រជាធិបតេយ្យ។