នគរបាលអាល់បានីបានបាញ់ឧស្ម័នបង្ហូរទឹកភ្នែក ដើម្បីបំបែកក្រុមបាតុករប្រឆាំងដែលបានគប់គ្រាប់បែកភ្លើង នៅអគាររដ្ឋាភិបាល និងវាយកម្ទេចទ្រព្យសម្បត្តិទីក្រុង ជាអ្វីដែលពួកគេបាននិយាយថា ជាផ្នែកមួយនៃការមិនគោរពច្បាប់ស៊ីវិល ប្រឆាំងនឹងរដ្ឋាភិបាល។

ក្រុមអ្នកតវ៉ាបានចោទប្រកាន់រដ្ឋាភិបាលរបស់នាយករដ្ឋមន្ត្រី លោក Edi Rama ពីអំពើពុករលួយ បក្ខពួកនិយម និងព្យាយាមកុំឲ្យក្រុមជំទាស់តវ៉ា។

បាតុករទាំងនោះក៏បានតវ៉ាប្រឆាំងផងដែរ ចំពោះការឃុំខ្លួនមេដឹកនាំគណបក្សប្រឆាំង លោក Sali Berisha ដែលត្រូវបានចោទប្រកាន់ពីបទពុករលួយ ពាក់ព័ន្ធនឹងសកម្មភាពដែលលោកបានធ្វើនៅពេលកាន់តំណែងជានាយករដ្ឋមន្ត្រី។ លោក Berisha បានបដិសេធមិនបានប្រព្រឹត្តអ្វីខុសឡើយ។

ហើយពួកគេក៏បានទាមទារឲ្យមានការដោះលែងសមាជិកសភា លោក Ervin Salianji ដែលត្រូវបានដាក់ពន្ធនាគារ កាលពីសប្តាហ៍មុន ដោយសារធ្វើនូវអ្វី ដែលអាជ្ញាធរបាននិយាយថា ជា «របាយការណ៍មិនពិត» ប្រឆាំងនឹងអតីតរដ្ឋមន្ត្រីក្រសួងមហាផ្ទៃ។ លោក Salianji បានច្រានចោលរាល់ការប្រព្រឹត្តិខុស ហើយបានពណ៌នាការជំនុំជម្រះនេះថា មានហេតុផលនយោបាយ។

វីដេអូពីកន្លែងកើតហេតុ បានបង្ហាញថា នគរបាលជាង ១.០០០នាក់ ត្រូវបានដាក់ពង្រាយ នៅតាមដងផ្លូវក្នុងរដ្ឋធានី Tirana ខណៈដែលអ្នកគាំទ្របក្សប្រឆាំងរាប់ពាន់នាក់ បានដើរពីអគារមួយទៅអគារមួយទៀតអមដោយការគប់គ្រាប់បែកភ្លើង ដុំថ្ម និងវត្ថុរឹងផ្សេងៗទៀត។

បន្ទាប់មក ក្រុមអ្នកតវ៉ាបានដើរដង្ហែពាសពេញទីក្រុង ដោយវាយកម្ទេចផ្ទាំងប៉ាណូ និងទ្រព្យសម្បត្តិផ្សេងទៀត ក្នុងទីក្រុង និងដុតធុងសំរាម។ នគរបាលបានបាញ់ឧស្ម័នបង្ហូរទឹកភ្នែកបន្ថែមទៀត នៅពេលអ្នកតវ៉ាចូលទៅកៀករដ្ឋសភា៕