កងកម្លាំងការពារអ៊ីស្រាអែល (IDF) បាននិយាយនៅក្នុងសេចក្តីថ្លែងការណ៍មួយថា អ៊ីស្រាអែល បានចាប់ផ្តើមនូវអ្វីដែលខ្លួនហៅថា ជាប្រតិបត្តិការមានកម្រិត និងគោលដៅប្រឆាំងនឹងចលនាហេសបូឡា Shia របស់ប្រទេសលីបង់ នៅភាគនិរតីនៃសាធារណរដ្ឋអារ៉ាប់ កាលពីថ្ងៃចន្ទ។

សេចក្តីថ្លែងការណ៍ បានឲ្យដឹងថា៖«កាលពីម្សិលមិញ (ថ្ងៃចន្ទ) កងពលលេខ ១៤៦ បានចាប់ផ្តើមសកម្មភាពប្រតិបត្តិការមានកម្រិត កំណត់ទីតាំង និងគោលដៅប្រឆាំងនឹងគោលដៅភេរវកម្ម និងហេដ្ឋារចនាសម្ព័ន្ធរបស់ក្រុមហេសបូឡានៅភាគនិរតីលីបង់»។

ក្នុងមួយឆ្នាំកន្លងទៅ កងពលនេះ បានប្រតិបត្តិការនៅផ្នែកខាងជើងនៃព្រំដែនអ៊ីស្រាអែលជាមួយប្រទេសលីបង់។ យោធាអ៊ីស្រាអែលបានបន្ថែមថា៖ «ចាប់តាំងពីការចាប់ផ្តើមនៃសង្គ្រាមមក ទីស្នាក់ការកណ្តាលនៃកងពលធំលេខ ១៤៦ បានបម្រើការជាកងពលតូចការពារក្នុងតំបន់ ហើយកងកម្លាំងរបស់ខ្លួន ត្រូវបានដាក់ពង្រាយនៅភាគខាងជើងអ៊ីស្រាអែល តំបន់ហ្កាហ្សាស្ទ្រីប និងតំបន់ Judea និង Samaria (ពាក្យរបស់អ៊ីស្រាអែលដែលប្រើជាឈ្មោះមួយផ្សេងទៀតសម្រាប់តំបន់វេសបែង (West Bank )» ។ ទាហានរបស់ខ្លួន នឹងត្រូវទទួលភារកិច្ចបង្ហាញ និងរុះរើ «ហេដ្ឋារចនាសម្ព័ន្ធភេរវកម្មក្នុងតំបន់»។

ភាពតានតឹង បានផ្ទុះឡើងម្តងទៀត នៅមជ្ឈិមបូព៌ានៅថ្ងៃទី ៧ ខែតុលា ឆ្នាំ ២០២៣ នៅពេលដែលក្រុម សកម្មប្រយុទ្ធមកពីចលនាបដិវត្តន៍ប៉ាឡេស្ទីនហាម៉ាសដែលមានមូលដ្ឋាន នៅតំបន់ហ្កាហ្សាស្ទ្រីប បានធ្វើការវាយប្រហារដ៏គួរឲ្យភ្ញាក់ផ្អើលមួយលើទឹកដីអ៊ីស្រាអែលពីតំបន់ហ្កាហ្សា ដោយបានសម្លាប់អ្នករស់នៅតាមព្រំដែនអ៊ីស្រាអែល និងចាប់ចំណាប់ថ្នូរជាច្រើននាក់។ ជាការឆ្លើយតប អ៊ីស្រាអែល បានប្រកាសពីការឡោមព័ទ្ធទាំងស្រុងនៃតំបន់ហ្កាហ្សាស្ទ្រីប ហើយបានចាប់ផ្តើមប្រតិបត្តិការយោធា នៅក្នុងដែនដីប៉ាឡេស្ទីន។