ប្រទេសរុស្ស៊ី នៅថ្ងៃអង្គារ (ទី៨ ខែតុលា) នេះ បានប្រាប់ឲ្យដឹងថា ខ្លួននៅតែមានខ្សែទូរសព្ទទាន់ហេតុការណ៍បន្ទាន់ជាមួយសហរដ្ឋអាមេរិក និងសម្ព័ន្ធមិត្តយោធាណាតូ (NATO) ដើម្បីទុកសម្រាប់កាត់បន្ថយវិបត្តិនានា ខណៈដែលហានិភ័យពីការប្រើប្រាស់អាវុធនុយក្លេអ៊ែរ កើនឡើងកាន់តែខ្ពស់ ចំពេលមានការប្រឈមមុខដាក់គ្នាយ៉ាងតឹងតែងបំផុត រវាងទីក្រុងមូស្គូ និងលោកខាងលិច គិតចាប់តាំងដំណាក់កាលដំបូងនៃសង្គ្រាមត្រជាក់។

សង្រ្គាមអ៊ុយក្រែនដែលមានរយៈពេល ២ឆ្នាំកន្លះហើយនោះ កំពុងឈានចូលដល់ពេលវេលាអ្វីដែលបណ្ដាមន្ត្រីរបស់រុស្ស៊ី និយាយថា ជាដំណាក់កាលដ៏គ្រោះថ្នាក់បំផុតរបស់សង្គ្រាមនេះ នៅពេលដែលកងកម្លាំងរុស្ស៊ីរុលទៅមុខ ហើយសហរដ្ឋអាមេរិកពិចារណាអនុញ្ញាតឲ្យទីក្រុងគីវវាយប្រហារចូលជ្រៅទៅក្នុងដែនដីរុស្ស៊ី ដោយប្រើប្រាស់មីស៊ីលរបស់លោកខាងលិច។

ប្រធានាធិបតីរុស្ស៊ី លោក Vladimir Putin កាលពីថ្ងៃទី១២ ខែកញ្ញា បាននិយាយថា ការយល់ព្រមរបស់លោកខាងលិច ដើម្បីឲ្យមានវិធានការបែបនេះ នឹងមានន័យថា ជា «ការចូលរួមដោយផ្ទាល់ពីប្រទេសសមាជិកអង្គការណាតូ សហរដ្ឋអាមេរិក និងបណ្តាប្រទេសអឺរ៉ុបផ្សេងទៀត ក្នុងសង្គ្រាមនៅអ៊ុយក្រែន»។

ចំណែកអនុរដ្ឋមន្ត្រីការបរទេសរុស្ស៊ី លោក Alexander Grushko ដែលមើលការខុសត្រូវទំនាក់ទំនងជាមួយអឺរ៉ុប និងអង្គការណាតូ បានប្រាប់ទីភ្នាក់ងារសារព័ត៌មានរដ្ឋ RIA ថា ទីក្រុងមូស្គូយល់ឃើញថា សម្ព័ន្ធមិត្តយោធាមួយនេះ កំពុងបង្កើនតួនាទីអាវុធនុយក្លេអ៊ែរ នៅក្នុងយុទ្ធសាស្ត្ររបស់ខ្លួន។

សម្រាប់ខ្សែទូរសព្ទទាន់ហេតុការណ៍ រវាងក្រុងមូស្គូ និងក្រុងវ៉ាស៊ីនតោន ទំនាក់ទំនងបន្ទាន់នេះត្រូវបានបង្កើតឡើង ក្នុងឆ្នាំ១៩៦៣ ដើម្បីកាត់បន្ថយការយល់ច្រលំ ដែលបង្កឲ្យមានវិបត្តិមីស៊ីលគុយបាឆ្នាំ១៩៦២ ដោយអនុញ្ញាតឲ្យមានការទាក់ទងដោយផ្ទាល់ រវាងមេដឹកនាំអាមេរិក និងរុស្ស៊ី។ ក្រៅពីខ្សែទូរសព្ទទាន់ហេតុការណ៍បន្ទាន់របស់មេដឹកនាំនៃប្រទេសទាំង២ ហើយនោះ ក៏នៅមានខ្សែទូរសព្ទទាន់ហេតុការណ៍ពាក់ព័ន្ធនឹងនុយក្លេអ៊ែរ រវាងមន្ទីរបញ្ចកោណ និងក្រសួងការពារជាតិរុស្ស៊ីផងដែរ ដែលត្រូវបានបង្កើតឡើងក្នុងអំឡុងសម័យសង្គ្រាមត្រជាក់ ដើម្បីកាត់បន្ថយហានិភ័យពីការមានសង្គ្រាមនុយក្លេអ៊ែរ៕