នាយករដ្ឋមន្ត្រីថ្មីរបស់បារាំង លោក Michel Barnier នៅថ្ងៃអង្គារ (ទី៨ ខែតុលា) នេះ ត្រូវប្រឈមនឹងញត្តិដកទំនុកចិត្តលើកឡើងមកដោយក្រុមឆ្វេងនិយម ដែលត្រៀមនឹងគូសបញ្ជាក់ពីភាពផុយស្រួយនៃរដ្ឋាភិបាលរបស់លោក ទោះបីជាទទួលបានឱកាសតិចតួច ដើម្បីសម្រេចគោលនយោបាយក៏ដោយ។

លោក Barnier ដែលជាអតីតអ្នកចរចារ Brexit (ការចាកចេញពីអឺរ៉ុបរបស់អង់គ្លេស) របស់សហភាពអឺរ៉ុបខាងក្រុមស្តាំនិយម ត្រូវបានតែងតាំងដោយប្រធានាធិបតីកណ្តាលនិយម លោក Emmanuel Macron ដើម្បីនាំឲ្យមានស្ថិរភាពខ្លះៗ នៅក្នុង «ការរួមរស់ជាមួយគ្នា» ដែលអាចងាយនឹងបង្កជាការបែកបាក់ នៅទូទាំងជម្លោះនយោបាយ បន្ទាប់ពីមានការបោះឆ្នោតសភា ដែលមិនមានលទ្ធផលឈ្នះដាច់របស់គណបក្សណាមួយ នាដើមរដូវក្តៅនេះ។

នាយករដ្ឋមន្ត្រីចាស់វស្សារវ័យ ៧៣ឆ្នាំ ចាប់តាំងពីពេលនោះមក បានព្យាយាមកាន់តំណែងយ៉ាងម៉ឺងម៉ាត់ ដោយព្រមានថា ប្រទេសបារាំងប្រឈមនឹងវិបត្តិហិរញ្ញវត្ថុ ប្រសិនបើឱនភាពថវិកា មិនត្រូវបានធ្វើឲ្យនៅរួមតូចទេនោះ ហើយនិយាយថា ការដំឡើងពន្ធអាចត្រូវបានអនុវត្ត ចំពោះអ្នកមានប្រាក់ចំណូលខ្ពស់។

ការតែងតាំងលោក Barnier ជាឥស្សរជនវណ្ណៈខ្ពស់ ដែលបម្រើការជារដ្ឋមន្ត្រី និងជាស្នងការសហភាពអឺរ៉ុប ក៏ជាអ្វីផ្ទុយខុសស្រឡះ សម្រាប់ជនជាតិបារាំងផងដែរ។ ពួកគេបានឃើញនាយករដ្ឋមន្ត្រី ៣រូបដែលស្ទើរតែមិនបានស្គាល់ នៅមុនពេលការតែងតាំងរបស់ពួកគេ កើតមានឡើង និងដកទៅវិញ ក្នុងចន្លោះរយៈពេល ៤ឆ្នាំមកនេះ។

ហើយលោក Barnier និងរដ្ឋាភិបាលរបស់លោក ដែលត្រូវបានតែងតាំងនៅក្នុងខែកញ្ញា ដោយមាននិន្នាការស្តាំនិយមយ៉ាងច្បាស់លាស់ អាចនឹងត្រូវដួលរំលំនៅពេលណាមួយ ប្រសិនបើញត្តិដកទំនុកចិត្ត ត្រូវបានអនុម័ត នៅក្នុងសភាជាន់ទាបរបស់រដ្ឋាភិបាល៕