យន្តហោះកាតា ដឹកស្បៀងអាហារ និងជំនួយវេជ្ជសាស្រ្តទៅកាន់ប្រទេសលីបង់ បានចាកចេញពីមូលដ្ឋានទ័ពអាកាស Al Udeid របស់ប្រទេសកាតា នាថ្ងៃអង្គារនេះ ដែលជាផ្នែកមួយនៃបេសកកម្មមនស្សធម៌រួមគ្នារវាងបារាំង និងកាតា ។

 លោក Jean-Baptiste Faivre គឺជាឯកអគ្គរដ្ឋទូតបារាំងប្រចាំនៅកាតា និយាយថា ពួកយើងដឹងថា ស្ថានភាពពិតជាពិបាកខ្លាំងណាស់នៅប្រទេសលីបង់ ហើយបារាំង នឹងបន្តកិច្ចខិតខំការទូតរបស់ខ្លួនជាមួយដៃគូ រួមទាំងប្រទេសកាតា ដើម្បីបញ្ឈប់សកម្មភាពយោធាអ៊ីស្រាអែលនៅលីបង់ ដើម្បីគោរពសេចក្តីសម្រេចលេខ ១៧០១ ។

 ការវាយប្រហារតាមច្រកអាកាសរបស់អ៊ីស្រាអែល បានធ្វើឲ្យមនុស្ស ១,២លាននាក់ ជម្លៀសខ្លួននៅក្នុងប្រទេសលីបង់ ហើយយុទ្ធនាការទម្លាក់គ្រាប់បែកដ៏ខ្លាំងក្លារបស់អ៊ីស្រាអែល ធ្វើឲ្យពលរដ្ឋលីបង់ព្រួយបារម្ភថា ប្រទេសរបស់ពួកគេអាចនឹងខ្ទេចខ្ទាំ ដូចនៅតំបន់ហ្កាហ្សា ។

 ក្រសួងសុខាភិបាលលីបង់ រាយការណ៍ពីការស្លាប់មនុស្សរាប់សិបនាក់ រួមទាំងក្រុមសកម្មប្រយុទ្ធ ១០នាក់ ដែលត្រូវបានសម្លាប់នៅក្នុងការវាយប្រហារតាមច្រកអាកាសលើអគារស្ថិតក្នុងតំបន់ព្រំដែន ។

 ពលរដ្ឋលីបង់ប្រហែល ២ពាន់នាក់ ត្រូវបានសម្លាប់ ចាប់តាំងពីក្រុមហេសបូឡាផ្ទុះអាវុធជាមួយអ៊ីស្រាអែល កាលពីរយៈពេល ១ឆ្នាំមុន ជាការបង្ហាញសាមគ្គីភាពជាមួយក្រុមហាម៉ាស់ ដែលភាគច្រើននៃពួកគេ ត្រូវបានសម្លាប់ក្នុងរយៈពេលប៉ុន្មានសប្តាហ៍កន្លងមកនេះ ៕