មន្ត្រីក្នុងតំបន់ បាននិយាយថា ការវាយប្រហាររបស់រុស្សីទៅលើទីក្រុង Kharkov នៅភាគឦសានប្រទេសអ៊ុយក្រែន នាថ្ងៃអង្គារ (ទី៨ ខែតុលា) នេះ បានបណ្ដាលឲ្យមនុស្សយ៉ាងហោចណាស់ ២១នាក់ រងរបួស ក្នុងនោះរួមមានទាំងកុមារផងដែរ។

អភិបាលតំបន់ លោក Oleh Syniehubov បានឲ្យដឹងតាមរយៈកម្មវិធីផ្ញើសារ Telegram ថា ការវាយប្រហារនេះ បានបំផ្លាញហេដ្ឋារចនាសម្ព័ន្ធ ហើយអាជ្ញាធរកំពុងធ្វើការ ដើម្បីផ្ទៀងផ្ទាត់ប្រភេទអាវុធដែលត្រូវបានប្រើប្រាស់។

លោក Syniehubov និងអភិបាលក្រុង Khariv គឺលោក Ihor Terekhov បាននិយាយថា វាទំនងជាថា រោងចក្រផលិតរបស់ជនស៊ីវិលមួយកន្លែង ត្រូវបានវាយប្រហារ។ លោក Terekhov បានប្រាប់ថា អគ្គិភ័យបានឆាបឆេះឡើង។ 

ហើយជាមួយគ្នានេះ លោក Terekhov បានបន្ថែមថា មនុស្ស ១៧នាក់ ត្រូវបានបញ្ជូនទៅកាន់មន្ទីរពេទ្យ បន្ទាប់ពីមានការវាយប្រហារនោះ ក្នុងនោះរួមទាំងក្មេងអាយុ ១៦ឆ្នាំផងដែរ។

គួរបញ្ជាក់ថា ដោយមានចម្ងាយ ៣០គីឡូម៉ែត្រពីព្រំដែនជាមួយរុស្ស៊ី ទីក្រុង Kharkov តែងតែក្លាយជាគោលដៅញឹកញាប់នៃការវាយប្រហាររបស់រុស្ស៊ី ចាប់តាំងពីការចាប់ផ្តើមនៃការលុកលុយពេញលេញរបស់ទីក្រុងមូស្គូ ក្នុងខែកុម្ភៈ ឆ្នាំ២០២២៕