ចំនួននៃការធ្វើដំណើរ ក្នុងស្រុក និងការចំណាយលើការធ្វើដំណើរសរុប អំឡុងថ្ងៃឈប់សម្រាកបុណ្យជាតិរយៈពេលមួយសប្តាហ៍របស់ប្រទេសចិន មានកម្រិតលើសពីចំនួន កាលពីឆ្នាំមុន ប៉ុន្តែការចំណាយ ក្នុងមនុស្សម្នាក់ៗ បានធ្លាក់ចុះជាងកម្រិត មុនមានជំងឺរាតត្បាត។ នេះបើយោងតាមក្រសួងវប្បធម៌ និងទេសចរណ៍។

ទិន្នន័យដែលបានចេញផ្សាយ នៅថ្ងៃអង្គារ (ទី៨ ខែតុលា) នេះ គឺជាសូចនាករដ៏សំខាន់នៃតម្រូវការអ្នកប្រើប្រាស់ និងស្ថានភាពសេដ្ឋកិច្ចរបស់ប្រទេសចិន។

ទិន្នន័យបានបង្ហាញថា ការធ្វើដំណើរក្នុងស្រុកចំនួន ៧៦៥លានជើង ត្រូវបានធ្វើឡើង នៅទូទាំងប្រទេសក្នុងអំឡុងពេលវិស្សមកាល Golden Week កាលពីសប្តាហ៍មុន ដែលកើនឡើង ៥,៩ភាគរយ បើធៀបនឹងរយៈពេលដូចគ្នាកាលពីឆ្នាំមុន។

ការចំណាយរបស់ភ្ញៀវទេសចរ ក្នុងស្រុក បានឡើងដល់ ៧០០,៨២ពាន់លានយ័ន (៩៩,៣០ពាន់លានដុល្លារ) ដោយកើនឡើង ៦,៣ភាគរយ ធៀបនឹងឆ្នាំមុន។

តែទោះជាយ៉ាងនេះក្ដី ការចំណាយ ក្នុងមនុស្សម្នាក់ៗ គឺមានកម្រិត ២,០៩ភាគរយ ពោលគឹទាបជាងរយៈពេលដូចគ្នា ក្នុងឆ្នាំ២០១៩ មុនពេលមានជំងឺរាតត្បាតកូវីដ-១៩។ នេះបើយោងតាមការគណនារបស់សារព័ត៌មាន Reuters។

ហើយទោះបីជាមានការកើនឡើងនូវការធ្វើដំណើរសរុបក៏ដោយ ក៏ការចំណាយជាមធ្យម បានកើនឡើងបន្តិច ០,៣៨ភាគរយ ធៀបនឹងឆ្នាំមុន ដែលស្ទើរតែនៅនឹងថ្កល់ ស្របតាមការព្យាករណ៍របស់អ្នកវិភាគ៕