ទិន្នន័យ ដែលចេញផ្សាយ នៅថ្ងៃអង្គារ (ទី៨ ខែតុលា) បានបង្ហាញថា ការនាំចេញរបស់ទួរគីទៅកាន់ដែនដីប៉ាឡេស្ទីន បានកើនឡើង ៦ដង ក្នុងរយៈពេល ៩ខែដំបូងនៃឆ្នាំនេះ ពោលគឺឡើងដល់ ៥៧១,២លានដុល្លារ ដោយរបាយការណ៍នេះកើតមានក្នុងរយៈពេល ៥ខែបន្ទាប់ពីប្រទេសនេះបានផ្អាកពាណិជ្ជកម្មជាមួយអ៊ីស្រាអែល ដើម្បីបង្ហាញការតវ៉ា ជុំវិញសង្គ្រាមរបស់ប្រទេសនេះ នៅតំបន់ហ្កាហ្សា។

បើយោងតាមទិន្នន័យពីស្ថាប័ននាំចេញទួរគី (TIM) បានឲ្យដឹងថា ការនាំចេញកើនឡើង ៥២៦ភាគរយ បានកើតឡើងភាគច្រើន បន្ទាប់ពីការហាមប្រាមបានចូលជាធរមាន ដោយក្នុងរយៈពេល ៤ខែដំបូងនៃឆ្នាំនេះ ការនាំចេញទួរគីទៅកាន់ដែនដីប៉ាឡេស្ទីន បានកើនឡើង ៣៥ភាគរយ ពោលគឺឡើងដល់ ៤៩,៤លានដុល្លារ។

កាលពីថ្ងៃចន្ទ (ទី៧ ខែតុលា) សមាជិកសភាបក្សប្រឆាំងទួរគី លោក Mustafa Yeneroglu បានដាក់សំណួរទៅកាន់សភា អំពីការកើនឡើងយ៉ាងខ្លាំងនៃការនាំចេញទៅកាន់តំបន់ដែនដីប៉ាឡេស្ទីន និងការបន្តចរាចរនាវាពីទួរគីទៅកាន់អ៊ីស្រាអែល ទោះបីជាមានការហាមឃាត់មិនឲ្យធ្វើពាណិជ្ជកម្មក៏ដោ

លោក Yeneroglu បានស្នើឲ្យរដ្ឋមន្ត្រីពាណិជ្ជកម្ម លោក Omer Bolat ឆ្លើយតបទៅនឹងរបាយការណ៍របស់ប្រព័ន្ធផ្សព្វផ្សាយ ក្នុងស្រុក ដែលថា ពាណិជ្ជកម្មជាមួយអ៊ីស្រាអែលកំពុងបន្តមានដោយស្ងាត់ៗ តាមរយៈក្រុមហ៊ុនប៉ាឡេស្ទីន ដោយមានឯកសារដឹកជញ្ជូនដែលពិពណ៌នាអំពីទំនិញថា នឹងបញ្ជូនទៅដែនដីប៉ាឡេស្ទីន នៅពេលដែលជាក់ស្ដែង ទំនិញទាំងនោះដឹកទៅអ៊ីស្រាអែល។

នៅពេលដែលត្រូវបានសួរ ដើម្បីសុំការអត្ថាធិប្បាយពីសំណាក់សារព័ត៌មាន Reuters ក្រសួងពាណិជ្ជកម្មបានចង្អុលទៅសេចក្តីថ្លែងការណ៍មុនៗ អំពីបញ្ហានេះ។ កាលពីថ្ងៃទី១៨ ខែកញ្ញា ក្រសួងបានបដិសេធថា ពាណិជ្ជកម្មជាមួយអ៊ីស្រាអែល កំពុងបន្តមាន ដោយបញ្ជាក់ម្តងទៀតថា ការហាមប្រាមបានបញ្ចប់នៅថ្ងៃទី២ ខែឧសភា៕