អាមេរិក៖ មន្ត្រីជាន់ខ្ពស់សហរដ្ឋអាមេរិកកាលពីថ្ងៃសុក្រ បានសុំទោសចំពោះរបៀបដែលបានប្រព្រឹត្តទៅលើជនអន្តោប្រវេសន៍ហៃទី នៅតាមបណ្តោយព្រំដែនអាមេរិក-ម៉ិចស៊ិក ដោយនិយាយថា វាមិនមែនជារបៀបដែលមន្ត្រីព្រំដែន ឬក្រសួងសន្តិសុខប្រទេសប្រព្រឹត្តឡើយ។
ការលើកឡើងរបស់លោក Juan Gonzalez ប្រធានជាន់ខ្ពស់នៃក្រុមប្រឹក្សាសន្តិសុខជាតិសហរដ្ឋអាមេរិក បានធ្វើឡើងក្នុងដំណើរទស្សនកិច្ចផ្លូវការរយៈពេល ២ថ្ងៃនៅប្រទេសហៃទី ដើម្បីពិភាក្សាជាមួយមេដឹកនាំតំបន់អំពីការធ្វើអន្តោប្រវេសន៍ និងបញ្ហាផ្សេងៗទៀត។ នាពេលថ្មីៗនេះ រដ្ឋាភិបាលសហរដ្ឋអាមេរិកបានរងការរិះគន់យ៉ាងខ្លាំងចំពោះការប្រព្រឹត្តទៅលើជនអន្តោប្រវេសន៍ហៃទី ដោយរូបភាពបង្ហាញពីបុរសជិះសេះដេញកៀងអ្នកស្វែងរកសិទ្ធិជ្រកកោនជនជាតិហៃទី។ លោក Gonzalez កំពុងធ្វើទស្សនកិច្ចជាមួយលោក Brian Nichols ជំនួយការរដ្ឋមន្ត្រីការបរទេសសហរដ្ឋអាមេរិក ក្នុងពេលដែលកំពុងបន្តបណ្តេញជនជាតិហៃទីចេញពីអាមេរិកទៅស្រុកកំណើតរបស់ពួកគេវិញ។
យោងតាមក្រសួងសន្តិសុខប្រទេសបានឲ្យដឹងថា ចាប់តាំងពីថ្ងៃទី១៩ ខែកញ្ញា សហរដ្ឋអាមេរិកបានបណ្តេញជនចំណាកស្រុកហៃទីប្រមាណ ៤.៦០០នាក់ចេញពីទីក្រុង Del Rio រដ្ឋតិចសាស់ តាមជើងហោះហើរចំនួន ៤៣ជើង។ លោក Gonzalez បាននិយាយថា ការប្រមូលផ្តុំជនចំណាកស្រុកនៅតាមព្រំដែនគឺជា ភាពអាសន្នសុខភាពសាធារណៈ ហើយបានព្រមានដល់អ្នកដែលកំពុងគិតអំពីការចាកចេញ កុំឲ្យប្រថុយជីវិតរបស់ពួកគេ៕
អត្ថបទ៖ ប៊ុន ថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
