កូរ៉េខាងត្បូង៖ នៅក្នុងការប្រារព្ធទិវាកងកម្លាំងប្រដាប់អាវុធកាលពីថ្ងៃសុក្រ ប្រធានាធិបតីប្រទេសកូរ៉េខាងត្បូងលោក Moon Jae-in បាននិយាយថា លោកនឹងប្រឆាំងយ៉ាងម៉ឺងម៉ាត់ចំពោះការប៉ុនប៉ងណាមួយ ដែលគំរាមកំហែងដល់អាយុជីវិតប្រជាជនរបស់លោក ហើយនឹងខិតខំដើម្បីទទួលបានសន្តិភាពយូរអង្វែង។
ប៉ុន្តែលោកមិនបាននិយាយពីការសាកល្បងមីស៊ីលប្រឆាំងយន្តហោះ នាពេលថ្មីៗនេះរបស់កូរ៉េខាងជើងឡើយ នៅក្នុងកិច្ចប្រឹងប្រែងដែលអាចធ្វើទៅបានដើម្បីរក្សាអារម្មណ៍ សម្រាប់ការចរចារវាងប្រទេសកូរ៉េទាំងពីរ។ លោក Moon បានអំពាវនាវឱ្យមានការប្រកាសបញ្ចប់សង្គ្រាមនៅលើឧបទ្វីបកូរ៉េ ក្នុងពេលដែលអាកប្បកិរិយាមិនច្បាស់លាស់របស់កូរ៉េខាងជើង ចំពោះទំនាក់ទំនងអន្តរកូរ៉េ។ លោកបានធានាដល់សាធារណជនក្នុងការបង្កើតសន្តិភាពនៅលើឧបទ្វីបដែលបែងចែកគ្នា ដោយបង្ហាញពីការប្តេជ្ញាចិត្តខ្ជាប់ខ្ជួនរបស់លោក ក្នុងការធ្វើឱ្យប្រសើរឡើងនូវទំនាក់ទំនងជាមួយប្រទេសកូរ៉េខាងជើង។
លោក Moon បានចូលរួមការប្រារព្ធទិវាកងកម្លាំងប្រដាប់អាវុធនៅទីក្រុង Pohang ដែលបានឃើញការធ្វើសមយុទ្ធ និងការបង្ហាញរបស់យោធាធ្វើឡើងរយៈពេលពីរថ្ងៃ។ កាលពីថ្ងៃសុក្រប្រព័ន្ធផ្សព្វផ្សាយរដ្ឋកូរ៉េខាងជើង KCNA បានរាយការណ៍ថា កូរ៉េខាងជើងបានបាញ់មីស៊ីលប្រឆាំងយន្តហោះថ្មីដែលទើបតែផលិត ជាការសាកល្បងអាវុធថ្មីបំផុតរបស់ខ្លួន ស្របពេលកិច្ចចរចាស្តីពីការរំសាយអាវុធនុយក្លេអ៊ែរជាមួយសហរដ្ឋអាមេរិក បានកំពុងជាប់គាំង។ នេះគឺជាការសាកល្បងអាវុធដែលត្រូវបានគេឃើញជាលើកទី២ របស់កូរ៉េខាងជើងនៅសប្តាហ៍នេះ បន្ទាប់ពីបានបាញ់សាកល្បងមីស៊ីលល្បឿនលឿនជាងសំឡេង ដែលគេមិនធ្លាប់បានមើលឃើញពីពេលមុនកាលពីថ្ងៃអង្គារ៕
អត្ថបទ៖ ប៊ុន ថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
