ក្រសួងការពារជាតិរុស្ស៊ី បាននិយាយកាលពីថ្ងៃអង្គារ (០៨ តុលា) ថា កងកម្លាំងរបស់ខ្លួនបានគ្រប់គ្រងតំបន់តាំងលំនៅចំនួនពីរនៅភាគខាងកើតអ៊ុយក្រែន ដែលជាការទទួលបានចុងក្រោយបង្អស់ក្នុងកិច្ចប្រឹងប្រែងវាយរុញរបស់ខ្លួនដើម្បីធានាបានតំបន់ ដុនបាស (Donbas)។

របាយការណ៍របស់ក្រសួងបាននិយាយថា ភូមិ ហ្សូឡូតា នីវ៉ា (Zolota Nyva) និង ហ្សូយ៉ាណេ ភើស្ហេ (Zoryane Pershe) ត្រូវបាននាំយកមកក្រោមការគ្រប់គ្រងរបស់រុស្ស៊ី។ សហគមន៍ទាំងនោះត្រូវបានប៉ាន់ប្រមាណថាមានអ្នកស្រុកប្រហែល ១០០នាក់។ ភូមិទាំងពីរស្ថិតនៅខាងជើង និងខាងត្បូងនៃតំបន់ គូរ៉ាខូវ (Kurakhove) ដែលជាចំណុចស្នូលមួយនៃសកម្មភាពយោធានៅជួរមុខភាគខាងកើត។

គណនីផ្លូវការរបស់អ៊ុយក្រែនដែលរាយកាណ៍ពីការប្រយុទ្ធ មិនបានលើកឡើងពីការបាត់បង់ការគ្រប់គ្រងភូមិណាមួយដែលរុស្ស៊ី អះអាងនោះទេ ប៉ុន្តែអគ្គសេនាធិការអ៊ុយក្រែន បានទទួលស្គាល់ថាតំបន់ Kurakhove ជាទីតាំងនៃការប្រយុទ្ធគ្នាខ្លាំងបំផុតនៅសមរភូមិភាគខាងកើត។

អគ្គសេនាធិការនោះ បានលើកឡើងចុងក្រោយពីភូមិ Zolota Nyva កាលពីថ្ងៃអាទិត្យថាជាភូមិមួយក្នុងចំណោមភូមិពីរដែលស្ថិតនៅក្រោមការវាយលុកជាបន្តបន្ទាប់របស់រុស្ស៊ី។ កងកម្លាំងអ៊ុយក្រែន កាលពីសប្តាហ៍មុន បានបោះបង់ចោលទីក្រុង វ៉ុលលេដា (Vuhledar) ចុងភាគខាងត្បូង បន្ទាប់ពីរយៈពេលពីរឆ្នាំនៃការការពារដោយជោគជ័យប្រឆាំងនឹងការប៉ុនប៉ងជាបន្តបន្ទាប់របស់រុស្ស៊ី ដើម្បីដណ្តើមយកតំបន់នោះ៕